Томас Бах Халқаро Олимпия қўмитаси президентлигига қайта сайланди

Таъкидлаш жоиз, 12 мартгача давом этадиган ушбу Сессиянинг асосий мақсади ХОҚ президентини сайлаш эди.

Аҳамиятлиси, ушбу лавозимга 8 йилдан бери ташкилотни бошқариб келаётган Томас Бахнинг ўзи ягона номзод бўлиб турган эди. Тадбир аввалида ХОҚ раҳбари ортда қолган давр оралиғида қилинган ишлар, Токио-2020 ва бошқа Олимпия ўйинларига олиб борилаётган тайёргарлик режалари ҳақида маъруза қилди. Онлайн ўтган тадбирда ХОҚ раҳбарияти, Ижроия қўмитаси аъзолари ва ташкилотнинг барча вакиллари, Халқаро федерация ва ассоциациялар раҳбарлари, спорт жамоатчилиги кузатиб борди.

“Ортда қолган давр ичида биз бир жамоа бўлиб жуда катта ишларни амалга оширдик. Олимпия ҳаракати, Олимпия бирдамлиги бутун дунёда янада оммалашди. Айниқса, Рио-2016 Олимпия ўйинларида қочоқ спортчиларнинг иштироки бу спорт тарихидаги энг аҳамиятли воқелик бўлди. Келажакда бу ва бошқа бир қатор лойиҳаларни биргаликда амалга оширишдан умидворман”, – деди Томас Бах.

ХОҚ раҳбари маъруза давомида келгуси Олимпия ўйинларида мусобақалар бюджетини ихчамлаштириш, Париж-2024 Олимпиадасидан бошлаб унда иштирок этувчи аёл спортчилар сонини эркакларники билан бир хил даражага олиб чиқиш ва бу билан гендер тенгликни таъминлаш, Токио Олимпиадасини хавфсиз тарзда ўтказиш каби режалари ҳақида айтиб ўтди. Анжуман давомида ХОҚ раҳбариятининг бошқа вакиллари ва ташкилот аъзолари Томас Бахнинг маърузаси ҳақида ўз фикрларини билдиришди.

Шундан сўнг ХОҚ президентлиги учун овоз бериш жараёни бўлиб ўтди. Унда Томас Бах номзоди маъқулланди (фақатгина 1 қарши овоз) ва ХОҚнинг амалдаги раҳбари келгуси 4 йил давомида ҳам ташкилотни бошқариб борадиган бўлди.