Тошкент "Катта Дубулға" турнирига бир ҳафта қолди

Келаси ҳафтанинг шу куни мусобақага қуръа ташлаш маросими ҳамда матбуот анжумани ташкил этилади. Ҳар иккала маросим ҳам онлайн тарзда ўтказилади.

Cўнгги маълумотларга таянадиган бўлсак, 5-7 март кунлари пойтахтимиздаги муҳташам "Ҳумо" арена саройи мезбонлик қилувчи мусобақада қатнашиш учун дунёнинг 76 давлатидан жами 530 нафар дзюдочи ариза берган. Иштирокчилар турнир медаллари билан бирга Токио Олимпиадаси йўлидаги муҳим рейтинг очколари учун татамига чиқадилар. Ҳозиргача Тошкентга Туркия ва Франция терма жамоалари етиб келишган. Эртага Миср терма жамоасининг ташрифи режалаштирилган.   

Уч кун давомида дзюдочилар 14 та (эркакларда 7 та, аёлларда 7 та ) медаллар жамланмаси учун беллашадилар. Мусобақа ғолиблари олтин медаль ва 1000 рейтинг очкосига эга бўладилар. Кумуш медаль эгалари 700 очкони қўлга киритсалар, бронза медаль соҳиблари ўз ҳисобларига 500 очко қўшиб қўядилар. 

Бўлажак мусобақада Ўзбекистон терма жамоаси ҳар бир вазн тоифасида тўрт нафардан дзюдочи билан иштирок этади. Регламентга кўра, фақат мусобақа мезбонигига бундай имкониятдан фойдаланиши мумкин. Қолган давлатлар эса ҳар бир вазнга максимум икки нафардан дзюдочи қўйиш имкониятига эга. Бугундан терма жамоамиз ёпиқ тарзда Тошкент "Катта Дубулға" турнирига тайёргарликка киришади.