Тошкентда IWF конгресси бўлиб ўтди

Унда ортда қолган йил сарҳисоби, бўлажак мусобақалар учун тайёргарлик, режалар муҳокама қилинди.

Тошкентдаги конгрессда иштирок этган барча меҳмонлар ҳукуматимиз ва бевосита Ўзбекистон оғир атлетика федерациясига меҳмондўстлик ҳамда юқори савиядаги ташкилотчилик учун миннатдорчилик билдиришди.  

Халқаро оғир атлетика федерацияси Бош котиби Муҳаммад Жаллуд: 

"Ҳаммага хайрли тонг. Авваламбор, Майкл Иранига ташаккур айтмоқчиман. Биз ковид билан, унинг янги тури билан курашяпмиз. Шунингдек, янги йилни кутиб олиш арафасида турибмиз. Бунга қарамай, бу ерда, оилаларидан узоқда бўлган ҳамкасбларимга раҳмат деб қоламан. Биз Париж-2024"гача оғир атлетикани "тозалаш" вазифасини ўз олдимизга қўйганмиз ва бунинг учун катта пул сарф қилинмоқда. Токио-2020 иштирокчилари орасида оғир атлетика спорт туридан бирорта ижобий допинг тести аниқланмади. Бу катта натижа ва бизнинг ютуғимиз. Кейинги мусобақаларда ҳам шу каби ҳолат бўлиши учун ишлашдан тўхтамаслик зарур. 

Фурсатдан фойдаланиб Ўзбекистонга катта раҳмат деб қоламан. Айнан Ўзбекистон йил давомида 3та халқаро мусобақани қабул қилди. Акс ҳолда биз ўсмирлар ўртасидаги жаҳон чемпионатини кейинроқ муддатга суришимиз ва бунинг оқибатида бутун бир авлодни йўқотишимизга тўғри келарди. Барчамиз гувоҳ бўлганимиз катталар ўртасидаги жаҳон чемпионати ҳам юқори савияда ўтказилди. Бунинг учун Шахрилло Махмудовга алоҳида раҳмат деб қоламан".

Халқаро оғир атлетика федерацияси президенти Майкл Ирани:

"Мен ўтган йил октябрь ойида IWF"га вақтинчалик раҳбар сифатида тайинландим. Ўтган вақт давомида оғир атлетика ривожи йўлида биргаликда меҳнат қилдик. Биз мустақил экспертлар гуруҳини ташкил этдик. Париж-2024да оғир атлетика учун ажратилган квоталар сонининг қисқартирилиши биз учун жиддий зарба бўлди. Аммо мен ХОҚ билан умумий тил топишимизга умид қилиб қоламан. Ваҳоланки охирги марта оғир атлетикачида допинг аниқланганига қанча бўлди? Яқин орада бундай ҳолат юз бермади, тўғрими? Биз катта кўламдаги ишни бажардик ва бунинг учун барчангизга раҳмат деб, табриклаб ўтмоқчиман.

Бу йил давомида биз мулоқот учун очиқлигимизни, муаммоларни бартараф этиш тарафдори эканлигимизни исботлай олдик. Апрелда ўсмирлар ўртасидаги жаҳон чемпионати айнан Тошкентда бўлиб ўтганди. Умид қиламанки, сизларга ҳам бу ерда барча шароитлар яратилди, овқатлар ҳам жуда мазали эди".