Тошкентда Workout учун биринчи бепул майдонча очилди+ФОТО

Қурилиш ғояси - лойиҳалашдан тортиб то бажарилгунича ҳамда молиялаш мамлакатимиздаги маҳаллий Buka бренди томонидан амалга оширилди. Майдонча воркаут учун барча зарур снарядлар билан жиҳозланган ва ҳамма ёшдаги кишиларнинг шуғулланиши учун мўлжалланган.

Майдонча зарур сифат стандартларига риоя қилинган ҳолда бажарилган. Барча снарядлар Ўзбекистонда ишлаб чиқарилган ва Street Workout Uzbekistan ҳамжамиятининг тажрибали воркаут спортчилари томонидан тест синовларидан ўтказилган. 

Ҳамжамият спортчилари очилишга йиғилган маҳалла аҳлига мастер-класс намойиш этишди. Маҳалла аҳли, ёшу қари, ҳаммаси катта қизиқиш билан ёндашишди, барча снарядларни текшириб чиқишди. Лойиҳа муаллифлари объект бир кун ҳам бўш турмаслигига, атрофдаги уйларда яшовчи кишиларнинг севимли даргоҳига айланишига ишонч билдиришди.  

Buka Boxing Sports Wear компанияси Ўзбекистонда соғлом турмуш тарзининг оммалашуви ва спортнинг ривожланишида фаол иштирок этмоқда. Компания яқин кунларда воркаут майдончаларини бошқа туманларда ҳам қуриб, шаҳар аҳолисига беғараз беришни режалаштирмоқда. 

Уйларга бевосита яқин бўлган бундай майдончалар болаларимизнинг спорт билан шуғулланишларига, ўз вақтларини фойдали ва мазмунли ўтказишларига гаров бўлади.  

“Биз бошқа компаниялар ҳам бу ташаббусни қўллаб-қувватлашади ва очиқ ҳавода спорт билан шуғулланиш мамлакатимиз бўйлаб кенг қулоч ёяди, деган умиддамиз. Шунда маҳалланинг ҳар бир аъзосига, айниқса болаларга спорт билан бемалол шуғулланиш имкони туғилади”, - деди Buka Boxing Sports Wear компанияси директори Отабек Анваров.

Воркаут – бу брусларда, турникларда, полда машқлардир. Баъзи элементлари гимнастикадан олинган, баъзилари янгидан ўйлаб топилган. Яъни, бу мутлақо янги кўча маданиятидир. Шуниси муҳимки, воркаутнинг ҳар бир машқида баданнинг барча мушаклари ўз оғирлиги туфайли ишлайди. Агар доимий равишда шуғулланилса, куч ва чидамлилик яхши ривожланади.