Туркия Гран-Присини битта медал ва 490 рейтинг очкоси билан якунладик

Уч кун давом этган мусобақада сайёрамизнинг 5 қитъаси 78 давлатидан жами 533 нафар иштирокчи Гран-При медаллари ҳамда Токио-2020 Олимпиадасининг муҳим рейтинг очколари учун татамига чиқишди. 

Маълумот учун, Гран-При ғолиблари ўз ҳисобларига олтин медалдан ташқари 700 рейтинг очкосини қўшиб қўйишди. Финалчилар 490 очкога бўлишди. Бронза медал эгалари 350 очкога эга чиқишди. Бешинчи ўринга 252, еттинчи ўриндан жой олган дзюдочиларга 182 очко тегди. Қуйига қараб қолган ўрин эгалари мос равишда 112, 84, 70 ва 10 очкога эга бўлишди. Шунчаки иштирок учун 6 очко тақдим этилди. 

Анталия татамиларида ўз имкониятини синовдан ўтказган ҳамюртларимиздан биргина Кемран Нуриллаев Ўзбекистонга кумуш медал билан қайтадиган бўлди. У мусобақанинг иккинчи куни терма жамоамиз ҳисобига ана шу ягона медални тақдим этди. -60 кг вазн тоифасида юртимиз шарафини ҳимоя қилган Кемран финалга қадар мағлубиятсиз етиб борди. Нуриллаев олтин медал учун кечган баҳсда қозоғистонлик Йелдос Сметовга имкониятни бой бериб қўйди.