Уч нафар теннисчимиз President's Cup саралашида иштирок этди

Соврин жамғармаси 100 000 АҚШ долларини ташкил қилувчи ушбу мусобақанинг саралаш баҳсларида 3 нафар теннисчимиз ҳам ўз имкониятини синовдан ўтказди. Лекин уларнинг уччаласи ҳам мағлубият аламини тотиб кўрди.

Саралашнинг еттинчи ракеткаси бўлган Арина Фольц иккинчи босқичда россиялик Валерия Уржумовага 1:6, 2:6 ҳисобида ютқазди. Айнан Уржумова биринчи даврада яна бир ҳамюртимиз Насиба Эсполовани 6:0, 6:0 ҳисобида мағлуб этганди.

Учинчи теннисчимиз Улжан Эсполова эса россиялик Варвара Кузнецовага 2:6, 0:6 ҳисобида имкониятни бой берди. Бугундан бошланадиган асосий тўр мусобақасида ўзбекистонлик теннисчилардан ҳеч ким иштирок этмайди. Фақат Арина Фольц жуфтлик баҳсларида германиялик дугонаси билан бош мукофот учун курашга киришади.