10 июн 11:48
Янгиликлар

Бокс/ММА

UFC 225. Чуқур нокдаун ҳолатига тушган чемпион якунда ғолиб бўлди

АҚШнинг Чикаго шаҳрида аралаш қоидалар бўйича UFC 225 оқшоми бўлиб ўтди.

Оқшомнинг марказий жангида ўрта вазн тоифасида UFC чемпионлик камари соҳиби Роберт Уиттакер даъвогар Йоэль Ромерога қарши октагонга кўтарилди.

Беш раундга мўлжалланган жанг ғолиби ҳакамлар берган баҳога кўра аниқланди. Ҳакамлардан икки нафари 48-47 ҳисобидаги ғалабани амалдаги чемпионга тақдим этди. Учинчи ҳакам худди шу ҳисобда Ромеро ғалаба қозонди деб ҳисоблади.

Эътиборлиси, Уиттакер учинчи раундда кучли зарбани ўтказиб юборди ва чуқур нокдаун ҳолатига тушиб қолди. Шунга қарамай, у ўзига келиб олишга улгурди. Бу жангда Йоэль ғалаба қозонган тақдирда ҳам чемпионлик камарига эга бўлмасди. Чунки, у бир кун аввал белгиланган вазн меъёрини бажара олмаганди.