UFC 325 турнирининг бонус соҳиблари маълум бўлди

Бироз аввал Австралиянинг Сидней шаҳрида якунига етган UFC 325 турнирининг ана шу бонус соҳиблари эълон қилинди. Оқшомнинг асосий жанги иштирокчилари - австралиялик чемпион Александр Волкановски ҳамда бразилиялик даъвогар Диего Лопес ўртасидаги тўлиқ йигирма беш дақиқа давом этган баҳс бугунги турнирнинг "Энг яхши жанги" деб топилди.  

Ярим енгил вазн тоифаси чемпионлиги учун кечган реванш мақомидаги жанг якунида амалдаги камар соҳиби ҳакамларнинг якдил қарори (50-45, 50-45, 49-46) билан ғалаба қозонганди. Ҳар икки жанги кафолатланган гонорардан ташқари 100 минг АҚШ долларидан бонус ишлаб олишди.

Эслатиб ўтамиз, Волкановски ўтган йилнинг апрель ойида ҳам ҳакамларнинг якдил қарори билан Лопесни мағлуб этиб, вакант бўлган чемпионлик камарини қўлга киритган ва ўшанда ҳам ҳар икки аралаш яккакураш устаси"Оқшом жанги" учун мукофот пуллари билан тақдирланган эди.

Рафаэль Физиевни иккинчи раундда техник нокаутга учратган енгил вазн тоифаси вакили Маурисио Руффи ҳамда Жейми Малларкини оғритиш усули билан таслим этган Куиллан Салкилд "Яхши иштирок учун" 100 000 долларлик бонусларни қўлга киритди.

Бундан ташқари, Бенуа Сен-Дени, Билли Элекана, Кемерон Роустон, Жонатан Микалле ҳам бонус тарзида 25 минг доллардан оладиган бўлишди.