UFC Махачев - Топурия жангига расмий муносабат билдирди

UFC раҳбари Дана Уайт вазиятга ўз муносабатини билдириб, бу жанг яқин орада аниқ амалга ошмаслишини маълум қилди. Илия Топурия бугун ярименгил вазндаги UFC камарини Макс Холлоуэйга қарши жангда муваффақиятли ҳимоя қилган тақдирда ҳам енгил вазн чемпиони Ислам Махачевга "вызов" ташлай олмайди. 

"Бу унинг илк чемпионлик ҳимоя жанги. Илия Исламнинг вазнига кўтарилишидан олдин ўз дивизионидагилар билан ҳисоб-китоб қилиб олиши шарт. Макс Холлоуэй худди шу йўлдан борганди. Яъни, олдин ўзини вазнидагиларни "тозалаб", кейин битта юқори дивизионга кўтарилганди. Ундан кейин Алекс Волкановски ҳам шундай қилди. Қоидаси ўзи шундай бўлади. Илиянинг ўзига ярименгил вазнда "вызов"лар кўп", - деди UFC раҳбари. 

Аввалроқ, Дана Уайт Ислам Махачевга яримўрта вазн чемпионлик камари учун имконият тақдим этишини айтганди. Фақат бунинг учун Махачев тўртинчи чемпионлик ҳимоя жангида ҳам ғалаба қозониши шарт. Ҳозирча Ислам бу вазифани уч бор муваффақиятли уддалади.