UFC рейтинги янгиланди: Стрикленд ғалабасига қарамай Имавовдан ўтиб кетолмади

Энтони Эрнандесни муддатидан аввал мағлуб этганига қарамай, Шон Стрикленд ўрта вазн тоифаси рейтингида франциялик Насурдин Имавовни ортда қолдира олмади. У дивизионнинг кучли ўнталигида учинчи поғонада қолди. Учинчи раундда техник нокаут билан мағлуб бўлган Эрнандес эса тўртинчи ўриндан олтинчи поғонага тушди. Бу эса Брендан Аллен ва Исраэль Адесаньяга биттадан ўринга кўтарилиш имконини берди.

Оғир вазн тоифаси рейтингида ҳам бир нечта ўзгаришлар кузатилди. Анте Делияни мағлуб этган Сергей Спивак Ризван Куниев билан ўрин алмашди. Витор Петрино дивизионнинг янги Топ-15 вакилига айланди. Саккизинчи ўринни эгаллаб келган Жаилтон Алмейда лигадан четлатилган. Марчин Тибура ва Мик Паркин 2, Деррик Льюис 3, Таллисон Тейшейра, Шамиль Газиев 1 поғонага кўтарилди. 

Энг енгил дивизион рейтингини кутилмаганда шу ҳафта охирида Мехикодаги UFC Fight Night 268 турнирининг марказий жангида Брендон Морено билан тўқнаш келадиган Лонир Кавана тарк этди ва унинг ўрнини Жозеф Моралес эгаллади.

Ўз дивизионларининг энг яхши Топ-15`талигига сербиялик Урош Медич (ярим ўрта вазн тоифасида 12-ўрин) ва Мелкуизаэль Коста (ярим енгил вазн тоифасида 13-ўрин) кирди ва Жоселин Эдвардс аёллар ўртасидаги енгил вазн тоифасида ўн тўртинчи ўриндан ўн биринчи ўринга кўтарилди.