UFC тарихидаги энг ёш жангчига айланган Росаснинг ёши "урилганми"?

Росас Жуниорнинг паспортидаги рақамлардан кўра бироз каттароқ кўринади. Бироқ Дана Уайт барчасини текширган.

Дана Уайтнинг даъвогарлар лигаси навбатдаги турнирида бир қанча қизиқарли жангларга гувоҳ бўлдик. Ушбу турнирда бир қанча жангчилар шартномага эга бўлишди. Мисол учун, Хабиб Нурмагомедовнинг ёшлигини эслатувчи Нурулло Алиев. Бундан ташқари, Рауль Росас Жуниор ҳам UFC'дан шартнома олди. Америкалик ёш спортчи Мэндо Гутьерресни ҳакамлар қарори билан мағлубиятга учратди. Жанг унчалик ҳам қизиқарли ўтмаган бўлса-да, эътибор қаратадиган бир жиҳат бор эди. Бу Раулнинг ёши бўлиб, у бор йўғи - 17 ёшда эди!

Бу билан йигитча промоушен тарихида бунгача сақланиб келган 19 ёшли энг ёш жангчи рекордини янгилади. Энг ёш жангчи бўлишига қарамасдан, Рауль ўша куни октагонда жуда тажрибали спортчидек кўринди. Раулнинг хотиржамлиги ва тажриба арсенали ҳаттоки Дана Уайтни ҳам ҳайрон қолдирди. Промоушеннинг қудратли раҳбари жангдан кейинги интервью жараёнида ҳам эмоцияларини яширмади.



"Йигитлар қўлидан келганича ҳаракат қилишди. 17 ёшли жангчининг ўзини тутиши мени ҳайратда қолдирди. Барчасини кузата туриб, Росаснинг UFC'да жанг қилишга тайёрлигига шубҳа қилмадим. Мен бу йигитдан ҳайратландим - у бетакрор. У мен кўрган ва: "Эй Худойим, бу йигит даҳшатнинг ўзгинаси, фантастика" деб ўйлайдиган йигитлардан бири", - дея таъкидлаб ўтган Уайт.

Росаснинг фаолиятида илк бор ҳакамлар қарори билан ғалаба қозонди. Аввалги беш жангини у муддатидан олдин якунлаган эди: битта нокаут ва тўртта сабмишен! Кураш - мексикалик йигитнинг кучли томонларидан бири - у бўғиш ва оғритиш усулларини яхши ўзлаштирган. Чидамлилик ҳам тўлиқ тартибда ривожланган, бундан ташқари, Росас уч раунд давомида мутлақ хотиржам ҳаракатланди. Унга фақатгина нокаут қилувчи зарба етишмаяпти, аммо бу вақтинчалик ҳолат.


Росаснинг кўриниши бироз чалғитувчан. Ижтимоий тармоқларда кўпчилик UFC мухлислари унинг 17 ёшда эканига шубҳа қилишмоқда. У бироз катта кўринади. Эҳтимол, Жуниор ёшини "ургандир"? Албатта бу ҳолатда истиснолар бўлмайди. Аммо бундай масаланинг таниқли промоушен билан боғлиқ экани, бунга ишончни сусайтиради. 17 ёшли йигитга ишонишдан аввал Дана унинг нозик томонларини ўрганган бўлса керак. Акс ҳолда, у Дана бўлмай қолади.