Уимблдон. Эркаклар ўртасидаги жуфтлик баҳсларида 3 та матчболдан чиқиб кетган тандем чемпион бўлди

Эркаклар ўртасидаги мусобақа бош соврини финляндиялик Харри Хелиоваара ва британиялик Генри Паттенга насиб этди. Улар ҳал қилувчи финал учрашувида ҳақиқий қаҳрамонлик кўрсатишди. Бу жуфтлик деярли 3 соат давом этган баҳсда 3 та матчболдан чиқиб кетишга муваффақ бўлди. 

Хелиоваара ва Паттен ҳамкорлиги финалда австралиялик теннисчилар Макс Пёрселл ҳамда Жордан Томпсон жуфтлигини иродали тарзда мағлубиятга учратди - 6/7(7), 7/6(8), 7/6(11:9). Уччала сет ҳам тай-брекка қадар етиб боргани учрашувнинг қанчалик муросасиз кечганини кўрсатмоқда. 

Баҳс давомида Хелиоваара ва Паттен 2, Пёрселл ҳамда Томпсон 15 та эйс зарбасини амалга оширган. Ҳар иккала жуфтлик ҳам бирон мартта рақиблари геймини ютиб ололмаган. Яъни, брейкдан ҳеч қайси жуфтлик фойдалана олмаган. Хелиоваара ва Паттен фаолиятларида илк бор "Катта Дубулға" турнирида чемпион бўлишди. Улар биргаликда 2000 рейтинг очкоси ва 650,000 фунт стерлинг мукофот пулини ҳам қўлга киритишди. Пёрселл ва Томпсон эса 1200 очко ҳамда 330,000 фунтга эга чиқди.