Сенегал футбол федерацияси Африка кубоги финалидаги қарорни CASга олиб чиқади

Сенегал футбол федерацияси Африка футбол конфедерацияси — CAF томонидан 2026 йилги Африка миллатлар кубоги финалида Марокашга қарши ўйин учун терма жамоага техник мағлубият ёзилган қарор устидан CAS — Лозаннадаги Спорт арбитраж судига шикоят киритади. Бу ҳақда федерация матбуот хизмати маълум қилди.

Аввалроқ CAF сенегалликларга финал учрашувда техник мағлубият берилгани ва мусобақа ғолиби сифатида Марокаш терма жамоаси эълон қилингани ҳақида хабар берган эди. Учрашув натижаси Сенегал футболчилари майдонни 10 дақиқадан ортиқ вақтга тарк этгани сабаб бекор қилинган.

"Сенегал футбол федерацияси CAF апелляция қўмитаси қарори ҳақидаги билдиришномани қабул қилди. Федерация мазкур адолатсиз, мисли кўрилмаган ва қабул қилиб бўлмайдиган қарорни қоралайди, бу эса африка футболи нуфузига путур етказади, — дейилади баёнотда. Сенегал футболи манфаатларини ҳимоя қилиш мақсадида федерация қисқа муддат ичида Лозаннадаги Спорт арбитраж судига мурожаат қилиш тартибини бошлайди. Федерация ҳалоллик ва спорт адолати тамойилларига содиқлигини яна бир бор тасдиқлайди ҳамда кейинги ҳаракатлар ҳақида жамоатчиликни хабардор қилиб боради".

Иккинчи бўлимга қўшиб берилган вақтда видеотакрор (VAR) орқали сенегалликлар урган гол бекор қилинди. Шундан сўнг яна видеотакрордан кейин Сенегал дарвозасига пенальти белгиланди. Бош мураббий Пап Тьяв норозилик сифатида жамоани майдондан олиб чиқиб кетди. Орадан 15 дақиқа ўтгач, сенегалликлар майдонга қайтишди ва дарвозабон Эдуар Менди Браим Диаснинг 11 метрли жарима зарбасини қайтарди. Асосий вақт 0:0 ҳисобида якунланди. Қўшимча вақтда эса ягона голга Пап Гейе муаллифлик қилди.