22 авг 08:00
Янгиликлар
Улар ЖЧга борадилар №5: Иқболжон Холдоров
Ўзбек бокси мухлисларига май ойида Тошкентда бўлиб ўтган Осиё чемпионатидан сўнг танилган Иқболжон Холдоров 1997 йилда Андижонда туғилган.
Фазлиддин Ғоибназаровдан сўнг бу вазн тоифасида Элнур Абдураимов рингга чиқа бошлаганди. Аммо, Осиё чемпионатида Элнур ўзининг севимли вазнига қайтарилди. -64 кг вазн тоифасида эса Ўзбекистон чемпионатида кумуш медални қўлга киритган Иқболжон Холдоров терма жамоа аъзосига айланди.
Ушбу вазн тоифаси боксда энг қийин ва шу билан энг томошабоп ҳисобланади. Бу ҳам Иқболга ўзига ҳос масъулиятни юклайди. Мазкур вазн тоифаси боксчисида бўлиши лозим бўлган ҳислатлар: тезкорлик ва чаққонлик унда топилади. Спортчининг статистикаларини кўздан кечирар эканмиз, у Ўзбекистон чемпионатида икки маротаба финалга чиқиб, иккаласида ҳам кумуш медаль билан кифояланган экан.
2015 йилги чемпионат ярим финалида у бугунги кунда профессионал боксда мағлубиятсиз одимлаётган ва яхшигина рейтинг очколарига эга бўлган Қудратилло Абдуқаҳҳоровни мағлубиятга учратган экан. Финалда эса Фазлиддин Мелибоевга имконият бой берилган.
2016 йилги Ўзбекистон чемпионатида эса финалда Элнур Абдураимовга ютқазиб қўйган.
Гамбург турнири Иқбол учун илк жаҳон чемпионати ҳисобланади. Турнирга у Тошкентда бўлиб ўтган Осиё чемпионатида йўлланмани қўлга киритган. Спортчимиз қитъа биринчилигида барча рақибларини мағлубиятга учратиб, олтин медаль соҳибига айланганди.
Ушбу ЖЧ Иқбол учун тажриба мактаби вазифасини ўташи кутилмоқда.
-64 кг вазн тоифасида ЖЧ фаворитлари қаторида арманистонлик Хованнес Бачков (Европа чемпиони), Озарбайжон вакили Лоренцо Сотомайор (Рио Олимпиадаси кумуш медали соҳиби, уни финала Фазлиддин Ғоибназаров мағлуб этгани ёдингизда бўлса керак) , кубалик Энди Круз Гомес (Иқболжон "Uzbek Tigers" сафида унга ютқазиб қўйган), Германия шарафини ҳимоя қилувчи Артём Харутюнянлар эътироф этилмоқда.
Германияда бўлиб ўтадиган жаҳон чемпионатида Холдоровнинг қайси босқичга етиб бора олиши борасида тахмин билдира олмаймиз. Ундан фақат ва фақат сюрпризлар кутиб қоламиз!
Азиз Тўхтамуродов
Фикрлар
Артур Григорянни куёви булган булиши керак.
2 ярим йил олдин уйланиш арафасида эди.
Новосибирскда APB жангларига келишгандилар, Харутунян ютказиб куйганди Россияликга, бизлардан Латипов козокга юткизган, шунда Артур айтиб колганди, якин орада Артём куёвим булади деб. Артём Германияда тугилган, арманчани хам русчани хам билмайди экан.