Улар Рио Олимпиадасига боришади – Раънохон Омонова

Раънохон Омонова – халқаро тоифадаги спорт устаси, бир нечта халқаро турнирлар ғолиби. 1994 йил 8 март куни Андижон шаҳрида дунёга келган. Илк мураббийи Равшан Омилов. Жорий йил у Қарши Давлат университетининг жисмоний маданият факультетини тамомлайди.

Рио-2016 Олимпиадаси йўлланмасини ўтган йилнинг 2-3 ноябр кунлари Қатар пойтахти Доха шаҳрида ўтказилган Гран-При турнирининг 7-босқичида қўлга киритган. Вакиламиз 200 метр масофага комплекс сузиш баҳсларида белгиланган меъёрни бажариб, кучли бешликдан жой олган эди.

Раъно Омонова бу йилги мавсумни ҳам яхши бошлади. У 21-25 январь кунлари оралиғида Бельгиянинг Антверпен шаҳрида ўтказилган халқаро турнирнинг 400 метр масофага комплекс усулда сузиш мусобақасида маррага 4 дақиқаю 40.71 сонияда етиб келиб, кумуш медалга сазовор бўлди. Айни пайтда у олимпия ўйинлари совриндори Сергей Заболотнов қўли остида машғулот ўтказяпти.

– Шу пайтгача 8 карра Ўзбекистон чемпиони бўлдим. Медалларим сони 600дан ошди. Бразилиядаги олимпиада мен учун фаолиятимдаги иккинчи олимпиада бўлади. 2012 йили Лондонда бўлиб ўтган 30-Ёзги Олимпия ўйинларида ёшлигим, кейин кучли ҳаяжон сабаб кўрсаткичларим бироз пастроқ бўлиб, 17-ўриндан жой эгаллагандим. Мақсадими, Рио Олимпиадасида муносиб тарзда иштирок этишдир, - дейди Раъно Омонова.