Умар Кремлёв: "WSB қайтади, профессионал боксдаги 15 та жангга ҳеч қандай тақиқ қўйилмайди"

Ўз тарихида илк бор шу ёш тоифасида ташкил этилаётган қитъа чемпионати олдидан “Hilton” меҳмонхонасида турнирга бағишлаб ўтказилган матбуот анжуманида Халқаро бокс ассоциацияси президенти Умар Кремлёв оммавий ахборот воситалари ходимларини қизиқтирган бир нечта долзарб саволларга жавоб қайтарди.  

“Ҳозирги даврда мусобақани коронавирус ё бошқа сабаблар билан бекор қилиб юбориш жуда осон. Бироқ Ўзбекистон томони ёшлар учун берилаётган бундай имкониятни сақлаб қолгани ва профессионал даражада ташкил этгани таҳсинга сазовор. Бу бевосита давлат раҳбари, ҳукумат ва спорт мутасаддиларининг соғлом турмуш тарзига бераётган юксак эътиборидан далолат. Бу келаси йил Тошкентда бўлиб ўтадиган жаҳон чемпионатидан олдин яхши репетиция бўлади. Тошкент бу йил Осиё, кейинги йил жаҳон боксининг пойтахти сифатида эътиборимизда”.

Анжуман давомида IBA раҳбари боксчилар учун “бронза”, “кумуш” ва “олтин” статусдаги мусобақалар ташкил этилаётгани, яқин вақт WSB каби бокс мусобақаларнинг бошқача аналоглари йўлга қўйилиши кутилаётгани ҳақида гапирди. Шунингдек, аввал профессионал боксда 15 та жанг ўтказган спортчининг ҳаваскор боксга қайтмаслиги каби тақиқ бутунлай олиб ташлангани кўпчилик учун қизиқарли маълумот бўлди.

Шунингдек, матбуот анжуманида Осиё бокс конфедерацияси президенти Анас Алотаиба, МОҚ раиси ўринбосари, Ўзбекистон бокс федерацияси раисининг биринчи ўринбосари Сакен Полатовҳам иштирок этди.