"ВТБ Кремль Кубоги". Карацевнинг финалдаги рақиби маълум

Дунёнинг 41-ракеткаси, хорватиялик Марин Чилич 1 соату 33 дақиқа давом этган ярим финал учрашувида ATP рейтингида 107-поғонадан жой олиб турган литвалик Ричардас Беранкисни 6/3, 6/4 ҳисобларида мағлубиятга учратди. 

Баҳс давомида 33 ёшли Чилич 10 та эйс зарбани ижро этди. 31 ёшли Беранкисда эса бу кўрсаткич нолга тенг бўлди. Теннисчиларнинг ўзаро учрашувларидаги ҳисоб ўзгарди - 2:0. Бугун Чилич бош соврин учун баҳсда россиялик Аслан Карацевга қарши кортга чиқади.