"ВТБ Кремль Кубоги" яна Москвада қолди

Ҳал қилувчи финал учрашувида дунёнинг 22-ракеткаси бўлиб турган мезбонлар вакили Аслан Карацев ATP рейтингида 41-поғонада бораётган хорватиялик Марин Чиличга қарши кортга чиқди ва 6/2, 6/4 ҳисобларида ғалаба қозонди. Теннисчиларнинг ўзаро учрашувларидаги ҳисоб мувозанати эса тикланди - 1:1.

Ўз ватанидаги муваффақиятли иштирок Карацевга 68,380 доллар мукофот пули ҳамда 250 рейтинг очкоси келтирди. Бу унинг фаолиятидаги иккинчи соврин бўлди. Тажрибали Чилич эса бир ҳафталик меҳнатидан 49,025 доллар ҳамда 150 очко ишлаб олди.

Эътиборлиси, қаторасига учинчи мавсум ҳам "ВТБ Кремль Кубоги"да россиялик теннисчи зафар қучмоқда. 2018 йил Карен Хачанов, 2019 йилда Андрей Рублёв бош соврин соҳибига айланганди. 2020 йилда эса пандемия сабаб турнир ўтказилмаган эди. 

Москвадаги соврин эвазига Карацев бугун эълон қилинадиган ATP рейтингида 18-ўринга кўтарилиб олади. Чилич эса 35-поғонадан жой олади. Асланнинг фаолиятида ишлаб топган маблағи 2 миллион 269 минг 190 долларга етди. 33 ёшли Марин Чилич турнири тарихидаги энг кекса финалчига айланди.