WADA Тамаш Аянга қўйилаётган янги айбловлардан хавотирда

Январь ойи бошида Германиянинг ARD телеканали журналист Хайо Зеппельтнинг IWF ва ташкилот раҳбари Тамаш Aянни коррупция яратиш ва допинг натижаларини яширганликда айбловчи фильмни намойиш этди. Натижада канадалик адвокат Ричард Макларен бошчилигида тергов бошлангани эълон қилинди.

Июнь ойида Insidethegames портали тергов натижаларини эълон қилди, унда Aян 40 та мусбат допинг-тестни яширгани, сайловларда овоз олиш учун пора бериш тизими ташкил қилгани ва 10 миллион доллардан ортиқ аниқланмаган маблағ топилгани ҳақида хабар берган эди.

Пайшанба куни playthegame.org порталида Aянга қарши бир қатор янги айбловлар ўрин олган маълумотлар пайдо бўлди. Хусусан, мақолада 2013 йилдаги мактубларга эътибор қаратилиб, унда IWFнинг собиқ раҳбари озарбайжонлик оғир атлетикачилар учун тест синовларининг манфий натижаларини қайта ишлашга аралашгани ҳақида айтилган. WADAнинг қайд этишича, бу қоидабузарликлар тўғрисида агентлик энди билмоқда.

«IWF собиқ президенти томонидан содир этилган хатти-ҳаракатлар ҳақидаги бу сўнгги даъволар кишини дарғазаб қилади. Изланишларни бошлаб берган WADA разведка ва тергов департаменти, шунингдек ОAВ хабарлари ва профессор Макларен хулосаларига кўра, оғир атлетикада узоқ вақтдан бери тоқат қилинган, рағбатлантириладиган ва яширинган допинг маданияти мавжуд бўлган. Бу аччиқ хабарни Антидопинг агентлиги ва бутун дунё бўйлаб ҳалол спортга ғамхўрлик кўрсатаётганлар қабул қила олмаслиги аниқ. WADA ушбу спорт туридаги спортчиларга хавфсиз ва соғлом муҳитда тенг шароитларда беллашиш учун барча имкониятларни ишга солишда давом этади», деди WADA бош директори Витольд Банька.

WADA Халқаро оғир атлетика федерациясининг янги раҳбариятидан Aян ишини кўриб чиқишда ОAВнинг сўнгги хабарларини инобатга олишни сўради. Шунингдек, агентлик федерацияга қарши ўз суриштирув ишларини давом эттираётгани, шунингдек, жиноят иши қўзғатган турли ҳуқуқни муҳофаза қилиш идоралари билан ҳамкорлик қилиб келаётганлиги ҳақида хабар берди.