Хабибдан сўнг тахт учун кураш. UFC хато қилдими?

Бир қарашда ушбу қарор на мантиқан, на адолат нуқтаи назаридан тўғри эмасдек кўринади. Аслида эса ундай эмас.

UFC'нинг адолатсиз қарори

Куни кеча россиялик UFC жангчиси Хабиб Нурмагомедов ўз фаолиятини тугатганини расман эълон қилди. UFC президенти Дана Уайт ҳам буни тасдиқлади ва Хабибга барчаси учун миннатдорчилик билдирди. Хабиб Нурмагомедовнинг кетишидан сўнг бир савол яна кун тартибига чиқди. UFC титули учун энди кимлар жанг қилади? Ўринли савол. Промоушен ва Дана узоқ куттиришмади. Енгил вазн тоифасидаги чемпионлик камари учун 15 май куни Чарльз Оливейра ва Майкл Чендлер жанг қиладиган бўлди.

UFC'нинг ушбу қароридан эса кўпчилик ҳайратга тушди. Албатта, UFC'да биргина жанг ўтказган Майкл Чендлерга титул жанги берилмоқда. Шунча йиллардан бери ташкилотда меҳнат қилиб келаётган ва рейтингда иккинчи ўринда турган Жастин Гэтжи ёки титул жангига 100% ҳақли бўлган 1-рақамли Дастин Порьега эмас. Аксинча, рейтингнинг 3 ва 4-ўринларида турган жангчилар титул учун жанг қилишмоқда. UFC'нинг яқин тарихида бундай ҳолат бўлмаган бўлса керак. Хўш? UFC шунчалик аҳмоқона қарор қабул қилдими? Наҳотки, Дана Уайтдек профессионал шунчалик мантиқсиз қарорга келган бўлса? Йўқ, асло ундай эмас. UFC'нинг ушбу қарори ортида жуда катта режалар бор ва бу қарор деярли ҳамма учун айни муддао бўлди. Биргина жангчидан ташқари, бу - Жастин Гэтжи. Ҳозир эса нега ушбу қарор ҳамма учун айни муддао бўлганини тушунтиришга ҳаракат қиламан. 

Дастлаб, титул жанги учун имкониятга эга бўлган жангчиларни санаб ўтайлик. Булар Дастин Порье, Жастин Гэтжи, Чарльз Оливейра ва Майкл Чендлер. Мен ушбу рўйхатга таъсир ўтказиши мумкин бўлган икки инсонни қўшмоқчиман: Конор Макгрегор ва Дана Уайт.  

Ўз ўзидан тушунарлики титул учун жанг қилаёган Чарльз Оливейра ва Майкл Чендлер воқеалар ривожидан тўла мамнун. Оливейра титул жангига тўла ҳақли эди ва у бунга эришди. Майкл Чендлер эса биргина жангдан сўнг чемпионлик имкониятига эга бўлмоқда. Америкалик жангчига барчаси омадли келмоқда. Ҳолис баҳо берадиган бўлсак, Чендлер бунга ҳали лойиқ эмас эди. Унинг ўзи ва Дана Уайтдан бошқа ҳамма бу фикрга қўшилса керак.

Ушбу воқеалардан норози бўлган ягона жангчи бу - Жастин Гэтжи. Жастин Хабиб Нурмагомедов билан жанг ўтказганидан сўнг унга ҳали имконият берилмади. Яқин орада унга жиддий рақиб берилиши ҳам қийин масала, сабаби топ-5'даги барча жангчиларнинг ўз режалари бор ва унда Гэтжига ўрин йўқ. Айнан шу нарса Гэтжини норози бўлишига сабаб бўлмоқда. Чендлер ва Гэтжи ўзаро солиштирилганда ҳам айнан Жастиннинг сўнгги жанги мағлубият эканлиги чемпионлик кураши учун унинг имкониятларини камайтириб юборган кўринади.  Бошқа тарафдан, Дана Уайт Майкл Чендлерга ўз симпатиясини яширмаяпти. Гэтжининг ўзи эса 15 майда Чендлер билан жанг қилишини кутгани ҳақида ёзди: 

"Мен кеча уйқидан Чендлерга қарши 15 май кунги жанг учун машғулот ўтказгани уйғонгандим. Бугун эса бундай эмаслигини билдим. Энди нима қилишимни тўғриси билмаяпман, аммо бу ҳис менга ёқяпти".

Бироз тушуниш қийин бўлган фикрлар. Тез орада Жастин Гэтжи ўз ичидагиларини тўкиб солса керак. Ахир фақатгина у UFC'нинг бу қароридан зарар кўрмоқда. 

Сихни ҳам кабобни ҳам куйдирмаган Порье 

Эндиги навбат асосий қаҳрамонимиз - Дастин Порьега. Деярли барча Дастинни чемпионлик жангида кутганди. Порьенинг ўзи ҳам бу энг катта орзуларидан бири эканлигини бир неча бор таъкидлаганди. Ўзи эса иккинчи йўлни танлади - Конор Макгрегор билан трилогия. Унинг бу қарори мухлислар орасида унчалик ҳам илиқ кутиб олинмади. Кўпчилик уни чемпионликни эмас, пулни танлаганидан норози. Мен эса бу ҳаракатга бошқачароқ ном бермоқчиман: "Дастин чемпионликни эмас, пул ва чемпионликни танлади". Қандай дейсизми? Тушунтиришга ҳаракат қиламан. 

Ишонтириб айтаманки, Дастин Порьега Чарльз Оливейра билан титул жанги таклифи берилган. Лекин, Дастин Конор билан жангни танлади. Бироз тушунарсиз, олдингда чампион бўлиш учун қулай имконият турганида бу каби иш тутиш... Хулоса чиқаришга эса бироз шошилмаймиз. Гап шундаки, Конор Макгрегор билан учинчи жанг Дастин Порьега чемпионлик жангидан кўра бир неча баробар даромад олиб келади. Трилогия Порьедан ҳам кўра кўпроқ Конорга кераклигини ва бу жангга Порье фаворит сифатида келаётганини ҳисобга олсак, Дастин ўзи хоҳлаган рақамларини сўрашга тўла ҳақли. Конор билан ўтказилган иккинчи жанг Порьенинг ўз фаолиятидаги энг катта гонорар бўлганини ва трилогияда ундан ҳам катта сумма ишлаши аниқ бўлса, ким ҳам бундай таклифни рад этади? Дастин асосий маблағини хайрия ишларига сарфлаши ва оиласини барча нарсадан устун кўришини ҳисобга олсак, уни ҳам тушунса бўлади.  

Келинг, Дастин олдида турган иккинчи йўлни тасаввур қиламиз. Дастин Порье Чарльз Оливейра билан чемпионлик жангини танлади дейлик. Дастин октагонга кўтарилди ва Оливейрани мағлуб қилиб чемпионга айланди. Дастин шундан сўнг Конор билан жанг қила олган бўлармиди? Катта эҳтимол билан, йўқ! Сабаби, Дастин Порье чемпион, Конор эса рейтингда 6-ўринда. Ирландияликка чемпионлик жанги берилиши шунчаки мантиқсиз иш бўларди. Бу ҳолатда Порье чемпионлик камарига эга бўлади, аммо каттагина пулдан қуруқ қолиши мумкин. 

Юқорида Дастин "Чемпионликни эмас, пул ва чемпионликни танлади", -деб айтиб ўтган эдим. Гап шундаки, Порьенинг титул учун жанг қилиши Конор Макгрегор билан жанг имкониятларини пасайтириб юборарди. Аммо, Конор билан жанг эса аксинча, чемпионлик жанги ўтказишга ҳеч қандай тўсқинлик қилмайди. Дастин Конорни яна мағлуб қиладиган бўлса, кейинги жангини бемалол чемпионлик учун ўтказиши мумкин. Катта пул эса ёнга қолади ва тарихда UFC тирик афсонаси Конор Макгрегорни икки марта мағлуб қилган ягона жангчига айланади. Аммо, бу фақатгина Дастин Порьенинг режалари, бу томонда эса икки катта фигура бошқа нарсани мақсад қилиб туришибди ва катта эҳтимол улар воқеаларнинг шу тарзда ривожланишига бевосита алоқадор.

"Месси" ва "Роналду"дан айрилишни хоҳламаётган Дана Уайт 

UFC'ни футболга солиштирадиган бўлсак Хабиб Нурмагомедов ва Конор Макгрегорни футболдаги Криштиану Роналду ва Лионель Мессига тенглаштиришимиз мумкин. Бу икки фигурани йўқотишдан футбол қандай жабр чекадиган бўлса, Конор ва Хабибнинг кетишидан UFC ҳам шунчалик талофат кўради. Дана Уайтнинг бу икки дахога муҳтож эканлиги шубҳасиз. UFC аллақачон улардан бирини йўқотиб бўлди – Хабиб ўз фаолиятини якунлади. Дана Уайт қўлидан келган ҳамма ишни қилди, аммо уни олиб қола олмади. Энди эса бор эътиборни иккинчи шахсни сақлаб қолишга қаратиш лозим. 

Ирланднинг вазияти бироз бошқачароқ. У жуда муҳим жангда Дастин Порьега имкониятни бой бериб қўйди ва Дана Уайтнинг режаларини ҳавога учириб юборди. Конор Макгрегор эса яна кучлилар сафига қайтиб олмоқчи. У Дана ва UFC учун энг керакли фигура, унинг иштирокидаги жанглар промоушенга мисли кўрилмаган даромад келтиради. Дана Уайт билвосита бўлсада Конорнинг тахт учун курашга қайтиши тарафдори. Бунинг энг оптимал варианти эса Порье билан трилогия. 

Жаноб президентнинг режалари тахминан шундай: Конор Дастин Порье устидан ғалаба қозонади ва кейинги жангини чемпионлик учун ўтказади. Ундан сўнг эса Дананиниг азалий орзуси - Хабиб Нурмагомедов ва Конор Макгрегор ўртасидаги реванш - бир неча юз миллион долларлик жанг, Хабибни қайтишга мажбур қилувчи ягона йўл. 

Кўриб турганингиздек, UFC'нинг Оливейра ва Чендлер ўртасида чемпионлик жанги ўтказиш қарори аҳмоқона кўрингани билан аслида ундай эмас. Кўпчилик айсбергнинг устки қисмини кўриб ҳафсаласи пир бўлмоқда, сув остида эса улкан режалар ётибди. Албатта, бу режалар бир-бирига қарама-қарши, ҳар бир жангчиники турлича. Порьенинг режалари Конорникига тўғри келмайди, Оливейраники эса Чендлерникига. Шу ўринда бир машҳур ибора эсга тушади:  "Юзига мушт тушишидан олдин ҳар кимнинг ўз режалари бўлади” деган эди Майк Тайсон. Кимнинг режалари амалга ошишини эса вақт кўрсатади. Биз эса барчасини кузатишда давом этамиз.

Мақола ҳақида, умуман UFC'нинг енгил вазн тоифаси ҳақида ўз фикрларингизни изоҳларда қолдиринг. Зеро, ҳар бир фикр биз учун қадрли.

Муаллиф: Жалолхон Иноғомхўжаев