15 ноя 10:52
Янгиликлар
Халқаро йиғин доирасида юлдузлар иштирокида кичик турнир ўтказилди ФОТОГАЛЕРЕЯ
Ўзбекистон дзюдо федерацияси қошидаги Дзюдо марказида ўтказилаётган машғулотларда мамлакатимиз спортчилари билан бирга Грузия, Франция, Қирғизистон ва Миср терма жамоалари иштирок этаётганди. Улардан ён қўшниларимиз машғулотни якунлаб, Бишкекка жўнаб кетишди.
Кеча халқаро машғулот доирасида Ўзбекистон ва Миср терма жамоалари ўртасида ўзига хос мусобақа ўтказилди. Унда уч карра Олимпия ўйинлари совриндори Ришод Собиров, Олимпиаданинг кумуш медаль соҳиби, жаҳон чемпиони Абдулла Тангриев, таниқли полвонимиз Шерали Жўраев каби дзюдочиларимиз ҳам ўз маҳоратларини намойиш этишди. Беллашувларни кузата туриб, олтин зангламас деган ақида нақадар тўғри эканига яна бир бор амин бўлдик. Беллашувларда халқаро тоифадаги IJF рефериларимиз Рамзиддин Саидов ва Вячеслав Перетейко ҳакамлик қилишди.
Ушбу тадбирни Ўзбекистон Миллий олимпия қўмитаси президенти Рустам Шоабдураҳмонов, МОҚ вице-президенти, Ўзбекистон дзюдо федерацияси раиси Азизжон Камилов кузатиб борди. Кичик турнир якунида Ўзбекистон дзюдо федерацияси томонидан меҳмонларга эсдалик совғалари тақдим этилди.
Фикрлар