10 июл 11:20
Янгиликлар

Бокс/ММА

Хамзат Чимаевда умуман кутилмаган рақиб

Асли чеченистонлик, ҳозирда Швеция шарафини ҳимоя қилаётган UFC жангчиси Хамзат Чимаев навбатдаги жангини 30 октябрь куни ўтказади.

Обрўли Combate нашри журналисти Рафаэль Мариньюнинг айтишича, Чимаев Абу-Дабидаги UFC 267 турнири доирасида октагонга кўтарилади. Унинг рақиби хитойлик Ли Цзинлян бўлади. Томонлар жанг шартлари бўйича келишиб олишган. Яқин кунларда жанг шартномасига расман имзо чекилади.

Эслатиб ўтамиз, Хамзат Чимаев сўнгги бор 2020 йилнинг сентябрь ойида октагонга кўтарилганди. Шундан сўнг у коронавируснинг оғир кўриниши билан касалланди ва ҳатто фаолиятини ҳам якунлаганди. Лекин Рамзан Кадировнинг саъй-ҳаракати билан бу фикридан қайтган эди.

Чимаев ММАда жами 9 та ғалабага эришган. UFC промоушенида қисқа муддатда учта жанг ўтказиб, барчасида рақибларини муддатидан аввал мағлубиятга учратди. Цзинлян эса фаолияти давомида 18 ғалаба ва 8 мағлубият қайд этган. Хитойлик жангчи UFC лигасида 2014 йилдан бери иштирок этиб келмоқда.