13 фев 10:19
Янгиликлар

Бокс/ММА

Хоакин Бакли: "Шавкат Раҳмоновни UFC’да бошқа ҳеч қачон кўрмаймиз"

Ярим ўрта вазн (77 кг гача) UFC рейтингида тўққизинчи ўринни эгаллаб турган Хоакин Бакли Шавкат Раҳмонов UFC’да бошқа жанг ўтказмаслигини маълум қилди.

Раҳмонов (19-0 MMA, 7-0 UFC)) тиззасидан қайта жароҳат олиб, операция қилинди ва камида тўққиз ойга сафдан чиқди. Қозоғистонлик 2024 йил декабрь ойида UFC 310 турнирида Иан Гаррини мағлуб этганидан бери октагонга чиқмаган. Яқинда у ярим ўрта вазн рейтингидан чиқарилганди.

"Нафақат рейтингдан чиқариб юбориш, балки ундан бутунлай қутулишлари мумкин. Чунки у узоқ вақтдан бери жанг қилмаяпти. Яқинда икки йил бўлади.

Ҳозир башорат қиламан: Шавкатни UFC’да бошқа ҳеч қачон кўрмаймиз. Гап шундаки, у контентмейкер эмас. Сен шундай ишларни қилишинг керакки, одамлар сенинг исмингни билиши лозим. Лекин ҳар сафар сен ҳақингда эшитганимизда, бу қандайдир салбий нарса бўлиб чиқмоқда. Вазият шу даражага борадики, мухлислар қизиқмай қўяди. Шунчаки Шавкатни унутишади, бунга ваъда бераман. UFC бундан кейин нима қилишини биласизми? Уни Қозоғистонга қайтаришади", - дея Баклининг сўзларини келтиради MMA Junkie нашри.