Ёш сноубордчилар кучлиларни аниқлашди

Дастурга кўра, мусобақа қайдномасига киритилган 25 нафар спортчи икки хил, слалом ва гигант-слалом йўналишларида куч синашишди. Слаломда 2003 йилда туғилган ва ундан кичик ёшдаги қизлар ўртасида бош соврин Валерия Майоровага топширилди. Унинг асосий рақиби Елизавета Зибицкер 2-бўлди. 1998-2002 йилларда туғилган қизлар баҳсида Динара Жубаева ғолиб чиқди. У Екатерина Лябинани ортда қолдирди. 16 ёшгача бўлган йигитлар ўртасида Элнур Мирзалиев ғолиб чиқди. Шахзод ва Азамат Исроиловлар шу тартибда кейинги ўринларни эгаллашди. 

1998-2002 йилларда туғилган спортчилардан иборат гуруҳда шоҳсупанинг юқори поғонасига Бекзодбек Исроилов кўтарилди. Кумуш медал Руслан Мирзалиевга, бронза эса Қайрат Мирзахметовга насиб этди. Гигант-слалом баҳсларида Елизавета Зибицкер ва Валерия Майорова шоҳсупадаги ўринларини алмашишди. Динара Жубаева ва Екатерина Лябина эса шоҳсупада худди слаломдагидек жойлашишди. 16 ёшгача бўлган йигитлар ўртасида Элнур Мирзалиевга тенг келадиган топилмади. 2-ўринни Шаҳзод Исроилов, 3-ўринни Элбек Патуллаев банд этди. 1998-2002 йилларда туғилган спортчилар гуруҳида энг яхши натижани Бекзодбек Исроилов кўрсатди. Кейинги совринли ўринларга Руслан Мирзалиев ва Қайрат Мирзаҳметов сазовор бўлди.