Загреб Гран-приси. 86 давлат орасида кучли бешликдан жой олдик

Мусобақада сайёрамизнинг 86 давлатидан сара полвонлар уч кун давомида Гран-при медаллари ҳамда Токио-2020 Олимпиадасининг қимматли рейтинг очколари учун баҳс олиб боришди. Загреб татамиларида 13 нафар дзюдочимиз юртимиз шарафини ҳимоя қилди. 

Якунда -60 кг вазн тоифасидаги вакилимиз Шарофиддин Лутфуллаев барча рақибларини мағлубиятга учратиб, бешинчи бор Гран-при турнирининг олтин медалини қўлга киритди. +100 кг вазн тоифасидаги 20 ёшли полвонимиз Алишер Юсупов эса мусобақанинг бронза медалини қўлга киритди. 

Шу тариқа, Ўзбекистон терма жамоаси Загреб Гран-присини биттадан олтин ва бронза медали билан умумжамоа ҳисобида 86 давлат орасида бешинчи ўринда якунлади. Словения терма жамоаси ҳам биз билан бир хил кўрсаткичга эга бўлди. 

Дзюдо ватани Япония терма жамоаси 4 та олтин ва 4 та кумуш медаль билан биринчи ўринни эгаллади. Кучли учликдан 2 тадан олтин медалга эга Канада ва Грузия терма жамоалари жой олишди. 

Тўққиз мамлакат - Япония, Канада, Грузия, Буюк Британия, Словения, Ўзбекистон, Исроил, Қозоғистон ва Испания терма жамоалари дзюдочиларига ўз уйларига камида битта олтин медаль билан қайтиш насиб қилди. Жами 26 та терма жамоа камида битта бронза медалини қўлга киритди.