Заррух Адашев: UFC жангимга 100-150 минг доллар харажат қилди

Хабарингиз бор, Адашев икки ҳафта аввал дунёнинг энг кучли промоушенидаги илк жангида америкалик Тайсон Нэмга биринчи дақиқадаёқ нокаут билан мағлуб бўлган эди. Заррух кеча Инстаграм саҳифасидаги онлайн мулоқотда дебют жангига тўхталди. 

"Мен Glory, Bellator ва бошқа промоушенларда жанглар ўтказганман. Ҳеч иккиланишсиз айта оламанки, UFC умуман бошқа дунё. Бу лигада ҳаммаси ўта профессионал даражада ташкиллаштирилади. Мен ўзимнинг жангим мисолида бир-иккита маълумотларни бераман.

UFC Тайсон Нэм ва мен учун камида 100 минг доллар сарфлади. Бу сумма 150 минг долларгача етиши ҳам мумкин. Аэропортнинг ўзида сизни алоҳида исм-шарифингиз ёзилган машина кутиб олади. Сизни юқори савиядаги сервис хизмати ҳамда илтифот билан меҳмонхонага етказишади. У ерда сизни жангга мураббийлардан ташқари диеотолог, психолог алоҳида тайёрлайди. Уларни UFCнинг ўзи сизга бириктириб беради. 

Тўғри, дебют жангим ўзим хоҳлагандек бўлмади. Бунинг ўзига яраша сабаблари бор. Катта гонорар ҳам олмадим. Мен учун пул биринчи ўринда эмас. Гонорарни ўйлаганимда Bellator промоушенидан кетмасдим. У ерда шахсий ҳомийларга эга эдим. Октагонга чиқадиган либосимнинг ўзида бир нечта компаниясни реклама қилардим", - деди Адашев.