132 247 muxlis ko'z o'ngida jang qilgan afsonaviy CHaves ham Toshkentga kelyapti!

Sizlarni ushbu nufuzli marosimdagi ishtirokini tasdiqlagan jahon boksi yulduzlari bilan tanishtirishni davom ettiramiz. Bugun yulduzli mehmon - Xulio Sezar CHaves! 

Xulio Sezar CHaves 1962 yil 12 iyul kuni Meksikaning Sbyudad-Obregon shahrida dunyoga kelgan. Professional ringda 1980 yil 5 fevral kuni debyut qilgan. 1984 yilning sentyabrida ikkinchi yarim engil vaznda vakant qolgan WBC chempionlik kamari uchun Mario Martinesga qarshi jang qilib, raqibini 8-raundda texnik nokautga uchratgan. Bu uning faoliyatidagi ilk chempionlik kamari edi. 

CHaves 1985-1987 yillar oralig'ida Ruben Kastilo, Rojer Meyvezer, Duayt Pratchett, Faustino Martires Barrios, Refujio Roxas, Rokki Lokrij, Xuan La Porte, Francisko Krus va Danilo Kabreroni mag'lub etib, o'ziga tegishli WBC kamarini himoya qilgan. 1987 yil Xulio engil vaznga o'tdi va WBA chempioni Edvin Rosarioni 11-raundda nokautga uchratdi. 1989 yilda birinchi yarim o'rta vaznga o'tib, Rojer Meyvezerni ikkinchi bor taslim etdi. Bu bilan u o'zining uchinchi kamariga ega chiqdi.     

CHaves prof boksdagi so'nggi jangini 2005 yil 17 sentyabr kuni o'tkazdi. U prof ringdagi 25 yillik faoliyati davomida Rojer Meyvezer, Oskar De La Xoyya, Pernell Uitaker, Frenki Rendall, Konstantin Czyu singari afsonalarga qarshi jang qilgan. U jami 115 ta jang o'tkazib, 107 g'alaba (86 nokaut), 6 mag'lubiyat va 2 ta durang qayd etgan. SHunchaki dahshatli statistika. To'rt yil (1990-1993) davomida The Ring jurnali tomonidan dunyoning eng yaxshi bokschisi deb topilgan. 

Darvoqe, 1993 yil 20 fevral kuni Xulio Sezar CHaves Mexikodagi "Estadio Acteka" stadionida amerikalik Greg Xogenga qarshi chempionlik jangida ringga ko'tariladi. Ushbu jangni tomosha qilish uchun "Acteka"ga 132 247 tomoshabin kelgan. CHaves raqibini 5-raundda texnik nokautga uchratib, yarim o'rta vazndagi WBC kamarini muvaffaqiyatli himoya qilgandi.   

Welcome El León de Culiacán!