22 dek 13:41
Yangiliklar

2022 yilda 5 nafar sobiq UFC chempionlari faoliyatini yakunladi

Teglar : Ti Jey Dillashou UFC Frenki Edgar

Dunyoning eng kuchli ligasi hisoblangan UFC promousheni uchun yakuniga etib borayotgan yil bir necha yulduz jangchilarning "qafas"ni bir umrga tark etishi bilan esda qoladigan bo'ldi.

Besh nafar sobiq UFC chempionlari - amerikaliklar Ti Jey Dillashou, Frenki Edgar, Lyuk Rokxold, braziliyalik Joze Aldo, polshalik Yoanna Endjeychik aynan 2022 yilda o'z faoliyatlarini rasman yakunlaganliklarini elon qilishdi.

Ti Jey Dillashou engil (61 kg.gacha) vazn toifasida ikki karra jahon chempioni hisoblanadi. U 2014 yilning may oyida shov-shuvli tarzda o'sha paytdagi pound-for-pound, yani vaznidan qatiy nazar dunyoning eng kuchli jangchisi braziliyalik Renan Baranni mag'lubiyatga uchratib, faoliyatida ilk bor UFC chempionlik kamarini qo'lga kiritgandi.

Frenki Edgar, jussasi (bo'yi 168 sm) kichikligiga qaramay, engil (70 kg.cha) vazn toifasida UFC chempioni bo'lgan. 2010 yilning aprel oyida u Bi Jey Penni mag'lub etib, chempionlikni qo'lga kiritgan. U shundan so'ng uch bor chempionlik kamarini muvaffaqiyatli himoya qilgan.

Lyuk Rokxold o'rta (84 kg.gacha) vazn chempioni bo'lgan. 2015 yilning dekabr oyida hamyurti Kris Uaydmanni to'rtinchi raundda taslim etib, chempionlik kamariga ega chiqqan.

Yoanna Endjeychik ayollar divizionining minimal vazn (52 kg.gacha) toifasida ilk bor 2015 yilning mart oyida chempion bo'lgan. U kamarini 5 ta jangda muvaffaqiyatli himoya qilgan va bu hozirgacha ayol jangchilar uchun rekord natija hisoblanadi.

Joze Aldo ham yarimengil (65 kg.gacha) vaznda chempionlik himoyasi (7 ta) borasida rekordchi bo'lib turibdi. 2015 yilning dekabriga qadar, yani Konor Makgregorga qarshi jangiga qadar vazn toifasidan qatiy nazar dunyoning eng yaxshi jangchisi bo'lgan.