Abdullaev Jahon chempionatining finalida, Jo'raboev bronza uchun kurashadi

Bugundan yunon-rum kurashchilar medallar uchun bahslarga kirishishdi. Klassiklar bellashuvida yurtimiz sharafini to'liq tarkibdagi kurashchilarimiz himoya qilishyapti. Quvonarlisi, 55 kg vazn toifasidagi hamyurtimiz Alimardon Abdullaev finalga etib keldi. 

U nimchorak finalda qirg'izistonlik Akyikat Kuljigit uuluni 5-1, chorak finalda ruminiyalik Denis Florinni 8-0, yarim finalda tojikistonlik Aslamjon Azizovni 8-3 hisobida mag'lub etdi. Endi u ertaga jahon chempionatining oltin medali uchun kechadigan bahsda eronlik Amirrizo Dehbozorgiga qarshi gilamga chiqadi. 

Yana bir kurashchimiz SHahriyor Jo'raboev esa jahon chempionatining bronza medali yo'lidagi o'tish bahsida ishtirok etadi. 87 kg vazndagi polvonimizning raqibi xorvatiyalik Kristian Lukach bo'ladi. Ushbu juftlik g'olibi bronza medali uchun kechadigan uchrashuvda turkiyalik Tansel Ortuchuga qarshi bahs olib boradi.