Abdurahmonov faxriylar o'rtasida jahon chempionati sovrindori

Bir nechta yosh toifasida o'tkazilayotgan dunyo birinchiligida Ziyodulla Abdullaev murabbiyligidagi uch nafar erkin va yunon-rum kurashchilarimiz yurtimiz sharafini himoya qilyaptilar. Erkin kurash bahslarida Abdujalil Abdurahmonov (62 kg) va Usmonjon Yusupov (88 kg), yunon-rum kurashi bellashuvlarida Sanjar Umarxo'jaev (100 kg) gilamga chiqadi. 

Quvonarlisi, yaqindagina o'zining 56 yoshini qarshilagan Abdujalil Abdurahmonov o'z toifasida, yani 40 yoshdan oshganlar bahsida jahon chempionatining bronza medalini qo'lga kiritdi. Abdurahmonov rossiyalik Gerasim Dyakonovni 5-0, AQSH vakili Jeffrey Mallettni 4-0 hisobida engdi. Yarim finalda moldovalik Boris Savvaga yutqazib qo'ydi. Bronza medali uchun kechgan bellashuvda esa armanistonlik Jora Xovannisyanni 3-0 hisobida taslim etdi. Ushbu vazn toifasida Boris Savva jahon chempioni bo'ldi.

Ertaga Usmonjon Yusupov medallar uchun kurashga kirishadi. Uning ilk bosqichdagi raqibi qirg'izistonlik Roman Saribaev bo'ladi.