Alimardon Abdullaev Jahon chempionati kumush medali sovrindori + FOTO

Yurtimiz sharafini 55 kg vazn toifasidagi bellashuvlarda himoya qilgan yunon-rum kurashichimiz Alimardon Abdullaev finalga qadar mag'lubiyatsiz etib kelib, jahon chempionatining kumush medali bilan taqdirlandi.  

U nimchorak finalda qirg'izistonlik Akyikat Kuljigit uuluni 5-1, chorak finalda ruminiyalik Denis Florinni 8-0, yarim finalda tojikistonlik Aslamjon Azizovni 8-3 hisobida mag'lub etdi. Jahon chempionatining oltin medali uchun kechgan bahsda esa eronlik Amirrizo Dehbozorgiga 1-3 hisobida imkoniyatni boy berib qo'ydi. 

Yana bir kurashchimiz SHahriyor Jo'raboev esa jahon chempionatining bronza medali yo'lidagi o'tish bahsida ishtirok etdi. 87 kg vazndagi polvonimiz avvaliga xorvatiyalik Kristian Lukachdan ustun keldi. Ammo, bronza medali uchun bo'lib o'tgan uchrashuvda turkiyalik Tansel Ortuchuga 3-5 hisobida yutqazib qo'ydi.