Armrestling. Terma jamoamiz Jahon chempionatida 25 ta medal qo'lga kiritdi FOTOGALEREYA

O'smirlar, yoshlar va kattalar o'rtasida o'tkazilgan dunyo birinchiligida sayyoramizning 51 davlatidan qo'l sporti ustalari medallar yo'lida bahs olib borishdi. Jahon chempionatida Qurbon Konishev boshchiligidagi O'zbekiston terma jamoasi azolari yurtimiz sharafini himoya qildilar. 

Kichik o'smirlar (15 yoshgacha) o'rtasidagi bellashuvlarda hamyurtlarimizdan SHahzoda Begimova (70 kg) o'ng qo'l mashqida oltin, chap qo'lda esa kumush medalni qo'lga kiritdi. O'smirlar (18 yoshgacha) bahsida qatnashgan Odamboy SHavkatov (+90 kg) chap qo'lda oltin medalga ega chiqdi. 

Yoshlar (23 yoshgacha) o'rtasidagi musobaqada Yarashboy Yo'ldoshev (60 kg) chap qo'lda bronza, Nazokat Solieva (70 kg) chap va o'ng qo'llarda 2 ta oltin, SHoxruh O'ktamov (75 kg) o'ng qo'lda kumush, chap qo'lda esa bronza, Siroj Tursunov (85 kg) o'ng qo'lda bronza, Oydinxon Sultonova (60 kg) chap va o'ng qo'llarda 2 ta bronza, Dilshod Mardonov (70 kg) chap qo'lda bronza, Umidjon Ermatov (55 kg) esa chap qo'lda bronza medaliga sazovor bo'ldi. 

Kattalar o'rtasidagi bahslarda Zoxir Fayzullaev (55 kg) o'ng qo'lda bronza, Nazokat Solieva (70 kg) chap va o'ng qo'llarda 2 ta oltin medalni terma jamoamiz hisobiga qo'shib qo'ydi. 

Faxriylar (40 yosh va undan yuqori) bellashuvida Dmitriy Dokuchaev (80 kg) chap va o'ng qo'lda 2 ta oltin, 50 va undan yuqori yoshdagilar musobaqasida qatnashgan Sulton Nematullaev (80 kg) chap va o'ng qo'llarda 2 ta oltin medal bilan taqdirlandi. 

Jismoniy imkoniyati cheklangan sportchilar bahsida Umiljon Ahmedov (90 kg) o'ng qo'lda bronza, Qudrat Toshboev (100 kg) chap va o'ng qo'lda 2 ta kumush, SHerzod Saidov (65 kg) chap va o'ng qo'lda 2 ta oltin medalni qo'lga kiritdi. 

SHu tariqa, O'zbekiston armrestling terma jamoasi 12 ta oltin, 4 ta kumush, 9 ta bronza, jami 25 ta medal bilan jahon chempionatida ishtirok etgan 51 davlat orasida umumjamoa hisobida uchinchi o'rinni egalladi.