Australian Open 2023. Arina va Elena qancha pul ishlab olishdi?

Bir daqiqasi kam ikki yarim soat davom etgan hal qiluvchi final uchrashuvida dunyoning beshinchi raketkasi, belaruslik Arina Sobolenko WTA reytingida 25-o'rinni egallab turgan qozog'istonlik Elena Ribakinani 4/6, 6/3, 6/4 hisoblarida mag'lub etib, Australian Open 2023 chempioniga aylandi.

Tennischilarning o'zaro uchrashuvlaridagi bahslarda Arina hisobni yanada yiriklashtirdi - 4:0. Statistikaga etibor qaratidigan bo'lsak, Sobolenko 18 ta eys, 7 ta qo'shxato va 3 ta breyk-poynt qayd etdi. Ribakina esa 9 ta eys, 1 ta qo'shxato va 2 ta breykka ega bo'ldi. 

Arina Sobolenko faoliyatida ilk bor "Katta Dubulg'a" turnirida bosh sovringa ega chiqdi. Dushanba kuni elon qilinadigan yangi reytingda u dunyoning ikkinchi raketkasi bo'lib oladi. 

Belaruslik tennis malikasi Melburndagi ikki haftalik mehnati uchun 2000 reyting ochkosi va 2 million 975,000 Avstraliya dollariga ega bo'ldi. Ribakina esa 1300 reyting ochkosi va 1 million 625,000 ming ishlab oldi.