Azamat "Drakon" Nuftillaevning sobiq raqibi, engilmas MMA jangchisi shartnoma imzolanganidan bir kun o'tib UFCʼdan ketdi

29 yoshli jangchining ketishiga uning Siril Gan va Frensis Ngannu bilan hamkorligi bilan tanilgan menejer va promouter Fernand Lopes bilan shartnoma borasidagi kelishmovchiliklari sabab bo'lgan.

"Ares FCʼda jang qilish uchun biz Lopes bilan hamkorlik qilishimiz kerak edi. Dastlab, u menga: "Sen uchun Ares bilan to'rtta jangdan iborat shartnoma bor. Agar UFC qo'ng'iroq qilsa, u erga borishingga ruxsat beraman" dedi. Men unga ishondim va shartnoma imzoladim. Lekin UFCʼga chaqirilganimdan so'ng, u Ares bilan haqiqiy shartnoma imzolashimga to'sqinlik qildi.

UFCʼda Ali Abdel-Aziz bilan shartnoma imzoladim va men 22 oktyabr kuni Abu-Dabida jang qilishim kerak edi. Biroq Fernand kelishuvga to'sqinlik qildi. U Aliga qo'ng'iroq qilib, meni UFCʼga qo'ygani uchun 90 ming evro talab qildi. Ali unga kelajakdagi UFCʼdan oladigan gonorarimdan foiz taklif qildi, ammo u rad javobini berdi", — dedi Trablesi Sport en Franceʼga bergan intervyusida.

Tunislik 29 yoshli Slim Trablesi faoliyati davomida mag'lubiyatga uchramagan va uning hisobida beshta g'alaba bor. Ulardan uchtasini u muddatidan oldin nokaut bilan yakunlagan. Og'ir vazn toifasidagi so'nggi jang shu yilning sentyabr oyida Parijdagi Ares FC 8 turnirida bo'lib o'tgan va u hamyurtimiz Azamat "Drakon" Nuftillaevni ikkinchi raundda texnik nokaut bilan mag'lub etgan. UFCʼda Slim Trablesi Hamdi Abdelvahob o'rniga amerikalik Parker Porterga qarshi debyut jangini o'tkazishi kerak edi.