Azizjon Kamilov: "Tokioda o'zbek dzyudosi tarixini yangilamoqchimiz"

Bugun O'zbekiston MOQda 6-9 aprel kunlari Qirg'izistonning Bishkek shahrida o'tgan dzyudo bo'yicha Osiyo-Okeaniya chempionati yakunlariga bag'ishlangan matbuot anjumani tashkil etildi. Unda MOQ Bosh kotibi Oybek Kasimov, Qo'mita raisi o'rinbosari, O'zbekiston dzyudo federaciyasi raisi Azizjon Kamilov, MOQ raisi o'rinbosari SHerzod Tashmatov, O'zbekiston sport faxriylari kengashi raisi Bahodir Maxsitov, terma jamoa murabbiylar shtabi, sportchilar va OAV xodimlari qatnashdi.

Ikki qitaning jami 29 davlati dzyudochilari ishtirok etgan musobaqada O'zbekiston terma jamoasi vakillari to'liq tarkibda yurtimiz sharafini himoya qilishdi. To'rt kunlik bellashuvlar yakunida dzyudochilarimiz 3 ta oltin, 2 ta kumush, 6 ta bronza medali bilan umumjamoa hisobida ikkinchi o'rinni band etishdi. Etiborga molik jihati shundaki, yakkalik bahslaridagi natija nuqtai nazaridan O'zbekiston terma jamoasi shu kungacha bo'lgan tarixni yangilashga muvaffaq bo'ldi. Yani, hozirgacha o'tkazilgan qita chempionatlarida dzyudochilarimiz tomonidan 3 ta oltin medal qo'lga kiritilmagan edi.

Tadbir davomida Azizjon Kamilov Bishkek turniri yakuni, Olimpiada rejalari bo'yicha fikrlarini bildirib o'tdi.

“Olimpiada yaqinlashib borar ekan, har bir kun juda muhim. Musobaqalarda maksimal darajada ochkolar yig'ib borishga harakat qilyapmiz. Oldimizda Olimpiadagacha 2 yirik musobaqa: Qozon “Katta dubulg'a” turniri va Budapeshtdagi JCH qoldi. Qozonga asosan yoshlar tarkibini jalb qilishga qaror qildik. Bu bilan ularni Parij-2024 Olimpiadasiga ham tayyorlab boramiz. So'nggi paytda qizlarimiz ham katta natijalarga erishishmoqda. Tokioga jamoamiz tarixida eng ko'p yo'llanmalar bilan bormoqchimiz. Asosiysi, unda o'zbek dzyudosi tarixini yangilashni maqsad qilib qo'yganmiz”, – dedi MOQ raisi o'rinbosari.

Qayd etish joiz, Osiyo-Okeaniya chempionatiga Xalqaro dzyudo federaciyasi prezidenti Marius Vizer ham tashrif buyurdi va rasmiylar yaqin rejalar haqida fikr almashishdi. Bu borada Azizjon Kamilov quyidagi gaplarni aytib o'tdi:

“Budapeshtdagi jahon chempionatiga bizdan maxsus ishchi guruh ham boradi va tashkiliy masalalar bo'yicha tajriba orttirib kelishadi. Bishkekdagi chempionat davomida maxsus dzyudo akademiyasining ham ochilish marosimi bo'lib o'tdi. Suhbat chog'ida janob Marius Vizer endi bizdan ham ana shunday obektlar kutib qolishini aytib o'tdi. SHubhasiz, qo'shni mamlakatimizdagi bunday o'sish bizga ham motivaciya beradi va bu dzyudomizning yanada rivojlanishi uchun turtki bo'ladi”.

Anjuman davomida terma jamoamizning Tokio Olimpiadasiga tayyorgarligi, kutilayotgan licenziyalar va sportchilarning holati bo'yicha savol-javoblar bo'lib o'tdi. Tadbir yakunida mutasaddilar bugun 39 yoshni qarshi olayotgan Xalqaro toifadagi hakam Ramziddin Saidovni yana bir bor qutlashdi va unga esdalik sovg'alari topshirildi.

Tadbir yakunida MOQ raisi Rustam SHoabdurahmonov jamoamiz vakillari bilan uchrashib, ularga kelgusi musobaqalarda ham omad va zafarlar tilab o'tdi.