Bahodir Jalolov Kamshibek Konkabaev haqida fikr bildirdi

Boks bo'yicha Tokio-2020 Olimpiadasi chempioni, bir qancha xalqaro musobaqalar g'olibi, professional boksda muvaffaqiyatli odimlayotgan o'zbekistonlik charm qo'lqop ustasi Bahodir Jalolov (12-0) qozog'istonlik Kamshibek Konkabaev haqida fikr bildirdi.

"Biz Kamshibek bilan yaxshi munosabatdamiz. U yaxshi do'st, yaxshi yigit. Inson sifatida ham yaxshi. U qozoq tilida gaplashadi, men o'zbek tilida. Munosabatlarimiz sof do'stona", - deya Jalolovning so'zlarini keltiradi sports.kz sayti.

Bahodir Jalolov va Kamshibek Konkabaev qarama-qarshiligi so'nggi bor 2021 yil 31 mayida — Dubay shahrida o'tkazilgan Osiyo chempionati doirasida bo'lib o'tgan edi. O'sha jangda hamyurtimiz hakamlarning yakdil qarori bilan g'alaba qozongandi.

Bundan tashqari, yaqinda yakunlangan "Stranja" musobaqasi chorak finali doirasida Jalolov - Konkabaev jangi o'tkazilishi lozim edi, biroq Kamshibek qo'lidan jarohat olib, jangda ishtirok eta olmasligini malum qildi.