Bahodir Jalolov: Qilayotgan mehnatimizni o'zimiz bilamiz, uni doim ham ko'z-ko'z qilishimiz shart emas

Bahodir Jalolov Olimpiadadan so'ng mashg'ulotlarni kamaytirdimi? Keyingi jang qachon va kim bilan? SHu kabi savollarga bokschimizning o'zi javob berdi.

“Ha, tadbirlarga ko'p chaqirishadi, lekin biz mashg'ulotlarni ham o'z vaqtida qilyapmiz. Mashg'ulotlar videosini har kuni tarmoqlarga joylay olmaymiz. Baribir raqiblarimiz bor, bizni kuzatib borishadi, kerakli joylarini qo'yamiz. Qilayotgan mehnatimizni faqat o'zimiz bilamiz, uni boshqalarga doim ham ko'rsatib, ko'z-ko'z qilishimiz shart emas. CHunki ringda jang qiladigan ham, qiynaladigan ham o'zimiz hisoblanamiz. Engilsak, jabr ko'radigan ham o'zimiz, g'olib bo'lganda huzur qiladigan ham o'zimiz. 

Yil yakunigacha prof boksda bitta jang o'tkazish niyatim bor. Hozirda shuning harakatidamiz. Mashg'ulotlarni to'xtatganim yo'q. Bugundan O'zbekiston boks federaciyasida jiddiy tayyorgarliklarni boshlaymiz. Raqib hali aniq bo'lmadi. Mag'lubiyatga uchramagan bokschini raqib sifatida berishlarini so'rayapman. Jang Toshkent yoki Dubayda bo'ladi. Raqib aniq bo'lsa, o'zim Instagram orqali xabar beraman. Yanvar oyida AQSHga yo'l olamiz", - dedi Bahodir Jalolov Olamsport.com sayti muxbiri bilan suhbatda.