Bahodir Jalolov va Dmitriy Xvanni tabriklaymiz!

Bahodir Jalolov 1994 yil 8 iyul kuni Surxondaryo viloyatida tug'ilgan. Jalolov Boks bo'yicha eng og'ir vazn toifasida ikki karra Osiyo chempioni, jahon chempioni hisoblanadi. 2019 yil Ekaterinburgda o'tgan JCHda zafar quchgan hamyurtimiz musobaqaning eng yaxshi bokschisi deb topilgan. SHuningdek, ushbu muvaffaqiyatidan so'ng muhtaram Prezidentimiz tomonidan “O'zbekiston iftixori” faxriy unvoni bilan taqdirlandi. Professional boksda 6 ta jang o'tkazib, ularning barchasida nokaut bilan g'alaba qozongan. Rio-2016 Olimpiya o'yinlari ishtirokchisi. Joriy yil Iordaniyada o'tkazilgan Tokio Olimpiadasiga yo'llanma beruvchi licenzion turnirda zafar quchib, yana bir Olimpiya o'yinlarida ishtirok etish huquqini qo'lga kiritgan.

Dmitriy Xvan 1980 yil 8 iyul kuni Toshkent shahrida tug'ilgan. Taekvondoning WT yo'nalishi bo'yicha terma jamoamizning tajribali murabbiylaridan biri. Uning shogirdlari orasida ko'plab xalqaro musobaqalar g'olib va sovrindori, Rio-2016 Olimpiya o'yinlari ishtirokchisi Nigora Tursunqulova, o'smirlar o'rtasida JCH finalchisi Amir To'raev kabi taekvondochilarimizni uchratish mumkin. 2018 yil “Jismoniy tarbiya va sport alochisi” ko'krak nishoni bilan taqdirlangan.

Fursatdan foydalanib, har ikki tavallud ayyom sohiblarini bugungi unutilmas kun bilan tabriklab, ularga uzoq umr, sihat-salomatlik, ulkan g'alabalar tilaymiz.