Baydarka va kanoeda eshkak eshish. Jahon chempionatining dastlabki g'olib va sovrindorlari aniqlandi

S1 dasturida ayollar o'rtasida 1000 metr masofaga o'tkazilgan yakkalik bahsida Xalqaro kanoe federaciyasi (ICF) bayrog'i ostida harakat qilgan Alena Nazdrova marraga birinchi bo'lib etib kelgan bo'lsa, K1 dasturida vengriyalik eshkak eshuvchi Emese Koxalmiga teng keladigani topilmadi. 

S2 dasturida erkaklar o'rtasidagi juftlik bellashuvida Zakhar Petrov va Ivan Dmitriev, K2 dasturida Mikita Borykau va Aleh Yurenia juftligiga teng keladigani topilmadi. Aytish joizki, ushbu sportchilar ham Xalqaro kanoe federaciyasi (ICF) bayrog'i sharafini himoya qildi. 

 K2 dasturida erkak va ayollar juftligi ishtirok etgan musobaqada 500 metr masofani birinchi bo'lib portugaliyalik sportchilar Teresa Portela hamda Messias Baptista bosib o'tdi. 

Hamyurtlarimizning natijalarga to'xtaladigan bo'lsak, 21 yoshli kanoechimiz Dinara Jo'raeva 1000 metr masofaga kechgan bellashuvda ettinchi, xuddi shu masofada Mirjalol Kamilov hamda Kamronbek Ahtamov juftligi to'qqizinchi bo'lib marraga etib keldi. Finaldagi eng yosh tandem bo'lgan bayrdarkachilarimiz SHahrizoda Mavlonova hamda Ozodjon Amriddinov 500 metr masofada beshinchi natijani qayd etishdi. 

Jahon chempionati ertaga, 25 avgust kuni yakunlanadi va musobaqaning so'nggi final bahslarida eshkak eshuvchilar 200, 500 metr hamda 5 kilometr masofalarda mahoratini namoyish etadi.