Bektemir Meliqo'zievning navbatdagi jangi ikkita kamar uchun o'tkaziladi

Yaxshi bilasiz, bizning vaqt bilan 31 oktyabr tongida Bektemir Meliqo'ziev prof ringda o'zining oltinchi jangini o'tkazadi. 

Ushbu bahsda hamyurtimizga meksikalik Alan Kampa raqiblik qiladi. Malum bo'lishicha, ushbu jang o'rta vaznda vakant bo'lib turgan WBA Continental va WBO InterContinental kamarlari uchun kechadi. 

Malumot uchun, 28 yoshli Alan prof ringda 23 ta jang o'tkazgan bo'lib, ularning 17 tasida g'alaba qozongan. Beshta jangda mag'lubiyat (2 ta nokaut) alamini totib ko'rgan. O'zi esa 11 ta bahsda raqiblarini muddatidan avval taslim etgan. So'nggi jangini 2019 yilning 2 may kuni Erik Baziniyanga qarshi o'tkazib, mag'lubiyatga uchragan edi.  

Bektemir Meliqo'ziev esa faoliyati davomida 5 ta jang o'tkazib, barchasida zafar quchgan. To'rtta jangda raqiblarini muddatidan avval enggan. So'nggi jangini shu yilning 14 fevral kuni Oskar Kortesga qarshi o'tkazib, nokaut evaziga g'alaba qozongan edi. 

Qayd etish lozimki, ushbu jang 28 avgust kuni o'tkazilishi lozim bo'lgan. Biroq kechaning markaziy jangi ishtirokchilaridan birida koronavirus aniqlangani sabab, jang oqshomi boshqa muddatga qoldirilgandi.