Belal Muhammad CHimaev va Kovingtonni tanqid qildi

Falastin/AQSH vakili, UFC jangchisi Belal Muhammad yaqin orada jangi rasman elon qilinishi kutilayotgan shveciyalik Xamzat CHimaev va amerikalik Kolbi Kovingtonni tanqid ostiga oldi. 

Muhammadning fikricha, CHimaev va Kovingtonning reytingda undan yuqorida ekani bu noto'g'ri. Ayni damda, Muhammad reytingda to'rtinchi o'rinda, CHimaev - uch, Kovington esa ikkinchi pog'onadan joy olgan.

"CHimaev - Kovington jangi haqida muzokaralar ketayotganini bilaman, lekin bu jangdan mano yo'q. Kolbi bu jangga rozi bo'lgan, deb o'ylamayman. Avval ham aytganimdek, Kovington katta janglarni qabul qilmaydi, u faqat o'zi mag'lub eta oladigan yigitlar bilan jang qiladi.

Endi Xamzat haqida gapirsak. Yaxshi, sen Gilbert Byorsni mag'lub etding, lekin senda yana reytinglilar bilan janging bormi? Nima uchun sen reytingda mendan yuqoridasan? U engil vaznli va mag'lubiyatli seriyaga ega yigitlardan tashqari hech kimni mag'lub etmagan", - dedi Belal Muhammad ESPN MMA YouTube kanaliga bergan intervyusida.

Eslatib o'tamiz, Belal Muhammad 22 oktyabr kuni amerikalik SHon Bredi bilan jang qilib, g'alaba qozongan edi.