"Besh tashabbus olimpiadasi" g'oliblari taqdirlandi FOTOREPORTAJ

O'zbekiston Respublikasi Prezidentining 2022 yil 11 apreldagi “Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari to'g'risida”gi 201-sonli Qarori ijrosini taminlash maqsadida tashkil etilgan “Besh tashabbus Olimpiadasi” shiori ostidagi musobaqalarning birinchi fasli ham o'z poyoniga etdi.

Bellashuvlar o'z nomiga yarasha besh bosqichda tashkil etildi. Mahalladagi musobaqalar orqali start olgan ommaviy sport tadbirlarida respublikamizning 3 100 000 nafardan ziyod 16 yoshdan 30 yoshgacha bo'lgan o'g'il-qizlar o'z imkoniyatlarini sinovdan o'tkazishdi. 

Musobaqalarning Respublika bosqichlarida esa (A, B, C ligalar bo'yicha) 5,5 ming nafarga yaqin ishtirokchi g'oliblik uchun bahs olib borishdi.

15 iyundan boshlab musobaqaning Respublika bosqichiga start berildi. Hal qiluvchi bellashuvlar mamlakatimizning deyarli barcha hududlarida yuqori saviyada tashkil etildi.

Respublika bosqichida g'olib bo'lgan 114 nafar ishtirokchi Sportni rivojlantirish vazirligi hamda Milliy Olimpiya qo'mitasi tomonidan munosib ravishda taqdirlandi. Marosimida Sportni rivojlantirish vaziri Adham Ikramov va uning o'rinbosari Abdulla Aslonov, Milliy Olimpiya qo'mitasi Bosh kotibi Oybek Kasimov ishtirok etishdi. 

G'oliblarga asosiy terma jamoalarimiz foydalanadigan sport ekiprovkalari taqdim etildi. Bundan ko'zlangan maqsad sog'lom turmush tarzi targ'ibotchilariga o'zbek sportining bir bo'lagi ekanliklarini his qilishdek imkonni taqdim etish bo'ldi.

Yana bir etiborga molik jihati, g'olib va sovrindorlarning mahallalariga sport maydonchalari ham qurib berilishi mutasaddilar tomonidan vada qilindi. Bundan ruhlangan ishtirokchilar yaratib berilayotgan imkoniyatlar va etibordan mamnun ekanliklaini aytib o'tishdi.

Alimurod MAMADAMINOV, o'z muxbirimiz