Beterbiev 38 yosh bo'lishiga qaramay barchani uxlatib qo'ymoqda. Navbat Bivolga…

Jang masalasi 7-raundda hal bo'ldi. Beterbiev Smitni burchakka qisib, tinimsiz zarbalar orqali nokaut evaziga taslim etdi. Ikki bokschi o'rtasidagi jang dastlab 2023 yilning avgust oyiga rejalashtirilgan edi, biroq Arturning tish operaciyasidan so'ng jag'ida infekciya paydo bo'lganligi sababli jang qoldirildi. 2024 yil yanvar oyida Beterbievning testi «atipik» natijalarni ko'rsatgach, bahs yana bir bor bekor qilinishi mumkin edi. Lekin, qo'shimcha testlar salbiy chiqqandi. 

«SHuni aytmoqchimanki, men sof jangchiman. Faoliyatim davomida biror marotaba taqiqlangan moddalar istemol qilmaganman. Buning aksini isbotlashga urinish tuhmat hisoblanadi. Bunday gaplar shunchaki o'rinsiz», dedi Beterbiev darhol bu kabi gap-so'zlarga. U oxirgi marotaba 2023 yilning yanvarida Entoni Yardni 8-raundda nokaut hisobiga taslim etganidan buyon ringga ko'tarilmayotgandi. Smit ham bir yarim yildan so'ng yana ringga qaytdi. U so'nggi bor 2022 yilning avgust oyida Matyo Boderlik bilan to'qnash kelib, uni 4-raundda nokautga uchratgandi. Ushbu jang Kallum uchun mazkur vazn toifasidagi ikkinchi jang edi. Bunga qadar u supero'rta vaznda boks tushib kelgan va WBA chempioniga aylangan, ammo kamarini Saul Alvaresga boy berib qo'ygan edi.

Qog'ozda Smit yoshi va antropometriyasi bo'yicha jiddiy ustunlikka ega edi, biroq Beterbievning rekordi dahshatliroq ko'rindi – 19 g'alaba va barchasi nokaut. Smitning rekordi bo'lsa, 29-1, uning kuchli zarba sohibi ekanligiga qaramay, g'alabalarining atigi 72 foizi muddatidan avval poyoniga etgan. Yakunda barcha faktorlarni chetga surgan holda Artur raqibini 7-raundda ringa qulatishga muvaffaq bo'ldi. CHechenistonlik bokschi ilk soniyalardanoq oldinga oshiqdi hamda raqibini ring arqonlariga qisib qo'ydi. Britaniyalik sportchi bo'lsa, ringni aylanib, zarba uchun qulay imkoniyatni kutdi, lekin Beterbiev uning erkin ishlashiga deyarli yo'l qo'ymadi. 

Smit antropometriyadagi ustunligidan unumli foydalanmadi va raqibini uzoq ushlay olmay, yaqin jang qilishni afzal ko'rdi. U Arturning hujumlariga dosh berib, javob hujumiga otildi, ammo zarbalar chechenistonlikning bloklaridan nariga o'tmadi. Uchinchi raundga kelib, Kallum o'tkazib yuborilgan zarbalar tasirida biroz o'zini yo'qotishni boshladi. Tanaffus vaqtida britaniyalikning murabbiyi qarshi zarba berishni kutmasdan, tana ustida ko'proq ishlashni maslahat berdi. Bu uslub unga qisman ustunlikni taqdim etdi, lekin Beterbievga u qadar zarar etmadi. Aksincha, uning zarbalari kuchliroq va aniqroq bo'ldi.

Ko'pchilik Smitdan chap tomondan aperkot zarbalarini kutgan edi, biroq hammasi chappasiga ketdi. 7-raunda kelib, uning o'zi o'ng tomondan kelgan aperkotni o'tkazib yubordi. Raqibining muvozanatni yo'qotganini payqagan Artur tezda oldinga o'tib, uni ikki marta polga ag'anatdi, shundan so'ng Kallumning burchagi jangni to'xtatishga qaror qildi. Britaniyalikning hujumlariga qaramay, jang bir tomonlama o'tdi deyish mumkin. Endi chechenistonlik bokschiga faqatgina bitta munosib raqib qoldi. U ham bo'lsa Dmitriy Bivol. «Ha, albatta, menga to'rtinchi kamar kerak. Bu men uchun ushbu vaznda barcha maqsadlarimga etgganimni anglatadi. Bo'lajak jang katta ahamiyatga ega», dedi Artur Beterbiev. Bob Arum esa chempion Ramazon oyidan 3 oy o'tib, Bivolga qarshi jangga tayyor bo'lishini aytib o'tdi.

Xabib Jo'raboev tayyorladi