Boksimiz yulduzlari SHahram Giyasovga "otvet" qilishdi

Jurnalist Marufxo'ja Xadjaevning "hozirgi avlod Riodagi natijani takrorlay oladimi?" degan savoliga Giyasov shunday javob qaytardi: "Ochig'i bu haqida hech narsa deya olmayman. Bu avlod qaytib kelmaydi. Riodagi natijani takrorlash uchun jamoada ahillik bo'lishi kerak. Bizni davrimizdagi bokschilarni, murabbiylarni bir-biriga bo'lgan muhabbatini hozir ko'rmayapman".

SHahram Giyasovning mazkur gaplariga qanday munosabatda ekanligini bilmoqchi bo'lib bokschi va murabbiylarga yuzlanganimizda "Sevimli" telekanalining "Zamon" informacion dasturi muxbiri ham voqea guvohiga aylangan edi. Bu masalada tashabbus va savol biz tomonimizdan yangraganiga qaramasdan "Zamon" informacion dasturi muxbiri bokschi va murabbiylarimizning Giyasovga javoblarini "tahlil qilgan" emish. Siz TV orqali Rahmatjon Ro'zioxunov va Bahodir Jalolovning qanday munosabatda ekanligini bilgansiz, xolos. Biz esa quyida boksimizning boshqa yulduzlari va federaciya rahbariyatining ham fikrlarini etiboringizga havola qilamiz. Demak boshladik!

Murodjon Mamadaliev (O'zbekiston boks federaciyasi bosh kotibi): 

"Nega endi jamoada ahillik bo'lmasin? Agar inoqlik bo'lmasa, unda bunday natijalarga qanday erishayapmiz? Qanday qilib Ekaterinburgda umumjamoa hisobida birinchi o'rinni oldik? Bu hammasi jamoada ahillik, birdamlik borligidan. Har kimni o'z fikri bor. Lekin SHahramning gaplari noto'g'ri".

Rahmatjon Ro'zioxunov (terma jamoa katta murabbiyi):

"SHahram Giyasovni hurmat qilamiz, yaxshi ko'ramiz, muxlislik qilamiz, shogirdimiz, u uchun jonimizni ham berishga tayyormiz. SHahram terma jamoada yursin, o'shanda biladi. SHahramga tashqaridan shunaqa ko'rinayotgan bo'lsa, yana ham bilmadim. Lekin ko'z tegmasin jamoamiz juda ahil. Hech narsa o'zgargani yo'q: o'sha murabbiylar, hozirgi yigitlar ularni ukalari. U hozir tepada turadi, biz pasroqdamiz. Bizni oldimizda yursagina vaziyatni biladi. Qaytanga, hozir avvalgidan ko'ra tartib-intizom kuchli. Lekin men unga rahmat deyman. Biz buni yana bir o'ylab ko'ramiz. Balki kamchiliklarimiz bordir. Endi u ham ancha tajriba orttirdi, katta yigit bo'lib qoldi. Yonimizga kelib "ustoz bu xato, bu to'g'ri" desa biz ham xulosa chiqaramiz".

Murodjon Ahmadaliev (terma jamoa azosi, professional bokschi):

"SHahram qaerdan biladi Tokioda nima bo'lishini? Hammasi Allohdan. Terma jamaoada ahillik bo'lganligi uchun ham terma jamoa Ekaterinburgda birinchilikni qo'lga kiritdi. Inoqlik avval ham bo'lgan, bundan keyin ham davom etadi. Hozir yigitlarda masuliyat ikki karra kuchli. Xudo xohlasa, Tokiodan yuzlari yorug' bo'lib qaytishadi. Ularga omad tilayman".

To'lqin Qilichev:(terma jamoa murabbiyi):

"SHahram hozir terma jamoada emasku, balki bilmas. Har kimga o'zi bo'lgan tarkib yoqadi, shuning uchun sog'inib gapirgandir. Rio Olimpiadasida rekord o'rnatgan edik, Jahon chemoionatida ham shu ishni qildik, faqat boshqa tarkib bilan. Xudo xohlasa, Tokioda yana bir bor buni isbotlaymiz. Ko'z tegmasin, oramizdagi mehr-muhabbat kundan-kunga mustahkamlansa mustahkamlanadiki, aslo kamaymaydi".

Bahodir Jalolov (terma jamoa etakchisi, jahon chempioni): 

"To'g'risini aytsam, SHahramni bu gaplaridan biroz ranjidim. Fikrlariga umuman qo'shilmayman. Balki bilmay gapirgandir, lekin ahillik yo'qligi haqida hech qanday gap bo'lishi mumkin emas. Natijaga keladigan bo'lsak, ilohim, Tokiodan 8 ta oltin olaylik. Agar minimum 2 ta oltin oladigan bo'lsak ham, 2016 yilgi natijani takrorlagan bo'lamiz. CHunki ular 10ta vaznda ishtirok etgan bo'lsa, bugungi kunga kelib Olimpiya o'yinlarida 8 ta vazn qolgan".

Biz ushbu material orqali SHahram Giyasov va terma jamoa o'rtasiga nizo solish niyatidan yiroqdamiz. SHunchaki, agar bunga terma jamoa azolari o'z munosabatlarini bildirmaganlarida, Giyasov ushbu masalada haq bo'lib chiqar edi.

Xurshida Abdikulova, Sarvinoz Raxmonqulova tayyorladi