Bu his-tuyg'ularni so'z bilan ifodalash qiyin. Kamshibek Konkabaev Olimpiada yarim finalidagi hakamlik, Bahodir Jalolov va Parij Olimpiadasi haqida gapirdi

Olamsport.com sayti intervyuni o'zbek tilida sizga havola qiladi.

- Kamshibek, yarim finalda g'alaba qozonishingizga nima to'sqinlik qildi?

- Menimcha, taktik xatolarga yo'l qo'ydim. Birinchi raundda ustunlik men tomonda edi, lekin raund amerikalikka berildi. SHuning uchun menga g'alaba qozonish uchun raqibidan ikki bosh baland bo'lish kerakligi aniq bo'ldi, aks holda ular g'alabadan voz kechishmaydi. Boshqa tomondan, taktikani o'zgartirmaslik ham mumkin emas edi - agar men ham xuddi shunday ishlaganimda va raundlar Torres tomon ketadigan bo'lsa, men biror narsani o'zgartirishga urinmaganim uchun afsuslanardim. Men g'alaba qozonish uchun ringda bor kuchimni berganimga ishonaman.

- Rossiyalik mutaxassislardan biri takidlaganidek, raqibingizdan yaxshiroq harakatlangan birinchi raundda siz uzoq masofadan jang qildingiz. Jangning ikkinchi bo'limida taktikani qanday o'zgartirdingiz?

- Ehtimol, xuddi shunday harakat qilishni davom ettirishim kerak edi, lekin men birinchi raqam sifatida ishlashga qaror qildim. Ikkinchi raundning boshida men Torresni zarba bilan qalqitib qo'ygan bo'lsam ham, uni enga olmadim. Orqaga nazar tashlasak, menimcha, birinchi raunddagidek ishlash mumkin edi.

- Uchinchi raundda hakamlar jarohat olganingiz uchun jangni to'xtatdilar. Siz bu qarorga qo'shilasizmi? Jangni davom ettirishga tayyormidingiz?

- Albatta, men yana jang qilishga tayyor edim. Uchinchi raundda men uzoq masofadan ko'proq ishladim. Lekin o'zingiz ko'rdingiz, jarohat kuchli edi. Hakamlar sportchining sog'lig'ini birinchi o'ringa qo'yishdi. SHuning uchun biz hakamning qaroriga hech qanday izoh bera olmaymiz.

- Jang oldidan Richard Torresning kuchli tomonlarini tahlil qildingizmi?

- Albatta. Biz uning janglarini murabbiylar bilan birga kuzatdik. Amerikalik kuchli bokschi, Panamerika o'yinlari chempioni. Olimpiadada oson raqiblar yo'q. Men Osiyo chempionatida, jahon chempionatlarida ishtirok etganman - xuddi Olimpiadada xuddi o'sha raqiblardek tuyulardi, lekin Olimpiada medallari uchun kurashga keladigan bo'lsak, bokschilarning qarashlari umuman boshqacha, ular ringda o'lishga tayyor ko'rinadi. Bu Olimpiada va boshqa turnirlarning farqi. Barcha bokschilar g'alaba qozonish uchun bor kuchlarini berishadi.

Torres kuchli bokschi, chapaqay, templi, juda ko'p zarba beradi, jismonan kuchli. Men uni mag'lub qila olaman deb o'yladim. Birinchi raund amerikalik tomoniga o'tgach, nimanidir o'zgartirish kerak edi. Men ikkinchi raundni yaxshi boshladim, hatto raqibimni qalqitib ham yubordim, lekin raundni shunday yakunlay olmadim. Menga psixologiya nuqtai nazaridan ham rol o'ynagan ogohlantirish berildi. Menga nima uchun ogohlantirish berilganini tushunmadim. Bu qo'shimcha bosim edi. Uchinchi raundda men tayyorgarlik ko'rdim, lekin jarohat tufayli jangni tugata olmadim. Kim biladi, agar jarohati bo'lmaganida, ehtimol jang boshqacha kechgan bo'lardi yoki hammasi bitta aniq zarba bilan hal bo'lardi.

- Mag'lub bo'lgan jangingizdan keyin o'zingizni qanday his qildingiz?

- Bu his-tuyg'ularni so'z bilan ifodalash qiyin. Albatta, umidsizlik, afsuslanish bor edi, men Qozog'iston sporti tarixini yangilay olmadim. Hayot shu bilan tugamaydi. Oldinda hali ko'p muhim startlar va turnirlar bor. Kim biladi, ehtimol men Parijdagi Olimpiadaga yo'l olarman.

- Boshqacha aytganda, keyingi Olimpiadada ham ishtirok etmoqchisiz?

- Bunday bo'lishi ham mumkin. Men ozgina dam olishim kerak. Bu savol murabbiylar, menejerlar bilan sinchkovlik bilan muhokama qilinishi kerak.

- Tokio Olimpiadasidan so'ng muxlislar tomonidan juda ko'p tanqidlar bo'ldi. Xususan, sportchilarni tayyorlash uchun etarli sharoit yaratilmaganligi aytildi. Umuman, jamiyatda mavjud bo'lgan tanqidlarga qanday qaraysiz?

- Tayyorgarlik shartlari nuqtai nazaridan, menda hech qanday savol va shikoyat yo'q. Biz barcha turnirlarga bordik, Amerika va Kubada yig'in o'tkazdik. SHu munosabat bilan men Qozog'iston Respublikasi Milliy olimpiya qo'mitasiga, Qozog'iston boks federaciyasiga o'z minnatdorchiligimni bildirmoqchiman. Tanqidga kelsak, unga to'g'ri munosabatda bo'lish kerak. Boshqa sport turlari haqida bilmayman, lekin boksda hamma Qozog'istondan oltin medal kutishgan. Tanqiddan xafa bo'lishga asos yo'q. Albatta, mamlakatga oltin medalni olib kelishning iloji bo'lmagani uchun ranjish bor. Ishonamanki, biz qaytamiz va faqat kuchliroq bo'lib.

- Olimpiadaning mukofot pullarini qanday sarflashni oldindan rejalashtirganmisiz?

- Mening ikkita akam, singlim, oilam bor. Men oilamga yordam berishni rejalashtiryapman. Men ularning hech narsaga muhtoj bo'lmasliklarini xohlayman. Ota-onamga va qarindoshlarimga yordam beraman.

- Sizga asosiy raqib deb atash mumkin bo'lgan bokschi bormi?

- Men o'zbekistonlik bokschi Bahodir Jalolovga qarshi etti marta jang qilganman. Men uch marta, Jalolov to'rt marta g'olib bo'lgan. Jahon chempionatida qatnashishni va u erda g'olib bo'lishni xohlardim.

Sarvinoz Rahmonqulova tarjimasi