Bu yil Olimpiya kuni nishonlanadimi?

Har yili ushbu tadbir respublikamiz miqyosidagi ham o'zgacha tashkil etiladi. Unda aholining deyarli barcha qatlami qamrab olinadi. Bu yilgi tadbirlar boshqacha formatda tashkil etilishi rejalashtirilgan. O'zbekiston Milliy olimpiya qo'mitasi Jismoniy tarbiya va sport vazirligi bilan hamkorlikda ushbu tadbirni tashkil etish yuzasidan onlayn yig'ilish o'tkazdi. Unda qo'mita va vazirlik rahbariyati Olimpiya kunini qay tartibda o'tkazish masalasini muhokama qilishdi.

Bu yilgi “Olimpiya kuni” murakkab sharoitda o'tishi bilan tarixda qoladigan bo'ldi. SHunga qaramasdan har bir mamlakatda mazkur sport bayramiga o'ziga xos tayyorgarlik olib borilmoqda. Uni O'zbekistonda ham zamon talabidan kelib chiqqan holda ko'tarinki ruhda o'tkazish har ikki tashkilotning bosh maqsadi bo'lib turibdi. Mazkur maqsad asosida tashkil qilingan yig'ilishda MOQ Bosh kotibi Oybek Kasimov, Jismoniy tarbiya va sport vazirining birinchi o'rinbosari Ravshan Irmatov, shuningdek, MOQ hamda vazirlik rahbariyati va xodimlari, hududlardagi vakillar ishtirok etishdi. Ushbu yig'ilishda ishtirokchilar pandemiya sharoitidan kelib chiqqan holda aholi orasida mana shunday sport bayramini targ'ib qilish borasida o'z takliflarini o'rtaga tashlashdi.

Takidlash joiz, Xalqaro olimpiya qo'mitasi ushbu bayram munosabati bilan barcha MOQlarga o'z tavsiyalarini jo'natgan. Suhbatda ushbu tavsiya asosida xorij tajribasini o'rgangan holda bayramga tayyorgarlik ko'rish va OAVda yoritish mavzulari ham ko'rib chiqildi. Yig'ilish davomida “Olimpiya kuni”ni o'tkazish borasida har ikki tashkilot o'rtasida ishchi guruh tuzilib, barchaga o'z sohasida qilinadigan ishlar bo'yicha tegishli ko'rsatmalar berildi. Mazkur bayramni ko'tarinki ruhda o'tkazish bo'yicha reja yakun kunlar ichida elon qilinadi. SHunisi aniqki, 2020 yilgi “Olimpiya kuni” karantin talablariga rioya qilingan holda o'tkaziladi.