Davlat Bobonov - 2020 yilning eng yaxshi sportchisi!

Hozirgina poytaxtimizdagi "Milliy" stadionda o'tgan tantanali marosimda Davlat Bobonovga ushbu mukofot O'zbekiston Jismoniy tarbiya va sport vaziri Dilmurod Nabiev tomonidan topshirildi. Tadbirda vazirning birinchi o'rinbosari Ravshan Ermatov, Milliy olimpiya qo'mitasi raisi Rustam SHoabdurahmonov, bosh kotib Oybek Kasimov ishtirok etdi.  

Davlat Bobonov 1997 yil 7 iyun kuni Navoiy viloyati Nurota tumanida dunyoga kelgan. Samarqand viloyat ixtisoslashtirilgan sport internati, Samarqand davlat universitetida taxsil olgan. Murabbiyi - Nurali Qobilov. Terma jamoa bosh murabbiyi, afsonaviy Ilias Iliadis murabbiyligida Olimpiadaga muhim reyting ochkolarini beruvchi musobaqalarga tayyorgarlik ko'rmoqda. 

Yosh bo'lishiga qaramay, hozirgacha aytishga arzigulik yutuqlarga erishishga muvaffaq bo'lgan. 2016 yil yoshlar o'rtasidagi Osiyo chempionatining oltin medalini qo'lga kiritdi. SHu yili Toshkent Gran-prisida ham zafar quchgan. SHu yil Germaniyada o'tkazilgan "Katta Dubulg'a" turkumiga kiruvchi Dyusseldorf turniri g'olibiga aylandi. Uning g'alabasi -100 kg vazndagi yana bir dzyudochimiz Muhammadkarim Xurramovni ham ruhlantirdi. U ham musobaqa chempioniga aylandi. "Katta Dubulg'a" turniridagi 2 ta oltin medal O'zbekiston dzyudosining so'nggi o'n yillikdagi eng yaxshi natijasi bo'ldi.