Dmitriy Bivolning jang sanasi, manzili va raqibi malum

Rossiyalik jahon chempioni o'z kamariga rasmiy va majburiy davogar Xilberto Ramiresga qarshi ringga ko'tariladi. CHempionlik jangi 5 noyabr kuni Birlashgan Arab Amirliklarida bo'lib o'tadi. Aslida kecha promouterlar o'rtasida jangni tashkil etish huquqi bo'yicha savdo o'tkazilishi kerak edi. Lekin WBA tashkiloti bokschilarning jamoalari o'zaro kelishib olganini malum qildi.

"Dmitriy Bivol - Xilberto Ramires jangi yuzasidan o'tkazilishi kerak bo'lgan promouterlik savdosi bekor qilindi. Ikkala tomon ham jangni 5 noyabr kuni BAAda o'tkazishga kelishib olishdi", — deyiladi WBA rasmiy bayonotida.

Kelishuv Matchroom Boxing (Bivol) va Golden Boy (Ramires) promouterlik kompaniyalari o'rtasida amalga oshgan. Jang DAZN striming plaformasi orqali translyaciya qilinadi. Ushbu striming servisi har ikkala bokschi bilae hamkorlik qiladi. 

"Biz Abu-Dabiga otlanyapmiz. Ramires 5 noyabr kuni Bivolga qarshi kechadigan jangda yarim og'ir vazn toifasida dunyoning eng kuchli bokschisi ekanini isbotlaydi", — dedi Golden Boy promouterlik kompaniyasi rahbari Oskar De La Xoyya.

Eslatib o'tamiz, har ikki bokschi ham oxirgi janglarini shu yilning may oyida o'tkazishgandi. Dmitriy Bivol Saul "Kanelo" Alvares ustidan tarixiy g'alabaga erishgan bo'lsa, ikkinchi o'rta vaznda sobiq jahon chempioni bo'lgan Ramires esa davogarlar jangida Dominik Byozeldan ustun kelgandi.