Doha. Humoyun Sultonov yakkalikda yarim final, juftlikda final yo'llanmasini qo'lga kiritdi

Musobaqada ishtirok etayotgan hamyurtimiz Humoyun Sultonov chorak final doirasida rossiyalik Marat SHaripovga qarshi kortga chiqdi. Uch set davom etgan uchrashuvda Sultonov raqibini 5/7, 7/5, 6/0 hisobida mag'lub etib, yarim final yo'llanmasini qo'lga kiritdi. Bugun tennischimiz yarim final doirasida estoniyalik Kristian Tammga qarshi bahs olib boradi. 

Taqqoslash uchun Humoyun ayni paytda jahon reytingida 490, Kristian esa 780-o'rinni egallab turibdi. 

Juftlik bahslarining yarim final doirasida Humoyun hindistonlik Parikshit Somani bilan birga rossiyalik Bobrov/SHaripov tandemiga qarshi o'yin o'tkazdi. Quvonarlisi, Sultonov/Somani tandemi raqiblarini 4/6, 6/3, 12/10 hisobida mag'lub etib, final chiptasiga ega chiqdi. Endi finalda bu juftlik italiyalik Jakopo Berrettitni va estoniyalik Kristian Tamm sherikligiga qarshi kortga chiqadi.