Dohada IJF Kongressi o'tkazildi. Liza Allan tashkilotning yangi Bosh kotibi!

Har ikki yilda bir marotaba o'tkaziladigan tadbirda IJFga azo barcha davlat delegaciyalari vakillari ishtirok etishdi. Ular qatorida O'zbekiston dzyudo federaciyasi bosh kotibi Aziz Sobirov va xalqaro bo'lim etakchi mutaxassisi Olimxon Mahmudmurodov ham bor edi. 

Kongressda so'nggi ikki yil davomida tashkilot tomonidan amalga oshirilgan ishlar sarhisob qilindi. Moliyaviy hisobot topshirildi. Keyingi ikki yil uchun mo'ljallangan rejalarga to'xtalib o'tildi. Bundan tashqari, tashkilot bosh kotibi va bosh g'aznachisi lavozimlariga saylovlar ham bo'lib o'tdi.

Uzoq yillar IJF bosh kotibi lavozimida ishlab kelgan franciyalik Jan-Lyuk Rujening o'rniga doktor Liza Allan delegatlar tomonidan bir ovozdan tashkilotning yangi bosh kotibi etib saylandi. Ruje IJF Ijroiya qo'mitasidagi faoliyatini davom ettiradi.   

"Nomzodimni qo'llab-quvvatlaganlar va menga ishonch bildirganlardan minnatdorman. Bu ishonchni oqlash uchun astoydil harakat qilaman", - dedi Allan xonim.  

Kongress davomida Naser Al Tamimi tashkilot bosh g'aznachisi etib qayta saylandi.